ریاست بہار کے ضلع ارریہ سمیت ملک اس برس کے شروعات سے ہی ایک ایسی وبا سے گزرا ہے جس سے ملک اب تک پوری طرح سے باہر نہیں آ سکا ہے۔
اس کورونا میں ہزاروں لوگ ہلاک ہوئے اور متعدد نے اس وبا سے لڑ کر نئی زندگی پائی، اس کورونا دور میں ہر شخص کے جان کی حفاظت حکومت کی پہلی ترجیح رہی۔
لوگوں کے گھروں سے باہر نکلنے پر مکمل پابندی رہی، کئی احتیاطی تدابیر اختیار کی گئی تو وہیں کئی شعبہ سے وابستہ ایسے لوگ بھی تھے جنہوں نے اپنی جان جوکھم میں ڈال کر لوگوں کی خدمت کی۔
دن رات دیکھے بغیر انسانی خدمت میں پیش پیش رہے، ایسے ہی لوگوں کے لیے آج ارریہ کورٹ احاطہ میں ایک اعزازی تقریب کا اہتمام کیا گیا اور کورونا واریئرز کو اعزاز سے سرفراز کیا گیا۔
ارریہ کورٹ سے وابستہ 29 لوگوں کو ارریہ کورٹ کے ضلع جج پیوش کمل دکشت نے گلدستہ اور سرٹیفیکٹ پیش کر اعزاز سے نوازا۔
ضلع جج نے کہا کہ جس وقت لوگ اپنے اپنے گھروں میں محفوظ تھے، اس مشکل بھرے وقت میں ارریہ ڈی ایل ایس اے کے ملازم کورونا واریئرز بن کر ہر حلقہ میں جا کر لوگوں کی مدد کر رہے تھے تاکہ لوگوں کو کسی طرح کی کوئی پریشانی نہ ہو۔
ڈی ایل ایس اے کے اس کام کی جتنی تعریف کی جائے وہ کم ہے، ضلع جج نے کہا کہ ان کے اس کام کی تعریف ہائی کورٹ پٹنہ اور سپریم کورٹ تک ہوئی۔
اس شعبہ نے سماجی خدمت میں پیش پیش رہ کر شعبہ کے ساتھ ارریہ ضلع کا بھی نام روشن کیا ہے، کورونا واریئرز محمد ارمان نے کہا کہ سب کاموں سے اوپر انسانی خدمت ہے۔
انہوں نے کہا کہ اس کام سے اگر کسی کی زندگی بچتی ہے تو اس سے بڑا کوئی کام نہیں، آج ضرورت ہے ہر لوگ اپنی اپنی سطح سے اس سونچ کو فروغ دیں۔
جن کورونا واریئرز کو اعزاز سے نوازا گیا ان میں ایڈوکیٹ دکھ موچن یادو، رضوان عالم، انیل کمار، رام نارائن مہتا، رام پرکاش سنگھ، جے پرکاش سنگھ، اشوک کمار، کومود کمار پاسوان، رمن کمار، محمد انور رضوان، دیپک پنڈت، مرلی منوہر، محمد ارمان، محمد پرویز عالم، امر کمار گوسوامی، رادھے شیام، پنکج کمار ٹھاکر، وجے کمار سنگھ وغیرہ کے نام شامل ہیں۔
اس موقع پر ضلع جج کے علاوہ کورٹ سے وابستہ دیگر عہدے دار بھی موجود تھے۔
