ریاست اترپردیش کے ضلع کشن گنج میں ہر برس کی طرح اس برس بھی کوچا دھامن حلقہ کے نظر پور پنچایت میں سہ روزہ ست سنگ پروگرام کا اہتمام کیا گیا جس میں نظرپور پنچایت، ہمت نگر اور مودھو پنچایت کی درجنوں خواتین نے شرکت کی۔
اس موقع پر سابق مکھیا اور راشٹریہ جنتا دل کے سینیئر رہنما شاہد عالم نے عقیدت مندوں سے ملاقات کر کے ان کی حوصلہ افزائی کی، ساتھ ہی ہر طرح کے تعاون کا بھروسہ بھی دلایا۔
وہیں شاہد عالم نے ای ٹی وی بھارت کے نمائندے سے خصوصی گفتگو کرتے ہوئے کہا کہ 'ست سنگ کے ذریعہ امن شانتی اور آپسی بھائی چارگی قائم کرنے کا پیغام دیا جاتا ہے۔'
جس طرح مسلمانوں میں جلسہ کے ذریعہ مذہبی پیغام کو عام کیا جاتا ہے، اسی طرح ست سنگ کے ذریعے ہندوں مذہب میں اپنے مذہب کے تئیں بیداری لائی جاتی ہے، اور یہ ہونا بھی چاہئیے کیونکہ جب تک انسان مذہبی نہیں ہوگا تب تک دوسرے انسانوں کی عزت احترام نہیں کر سکتا۔
شاہد عالم نے کہا کہ جہاں جہاں بھی اس طرح کے پروگرام ہوتے ہیں میں نہ صرف پہونچتا ہوں بلکہ ہر طرح کا تعاون بھی کرتا ہوں.
انہوں نے مزید کہا کہ بھگوان، یا اللہ وہ سب کو انسان بناتا ہے، ہندو اور مسلمان تو دنیا والے بناتے ہیں. مذہب کی بنیاد بھی دلوں کو جوڑنے اور اپنے خالق کو پہچاننے اور ان کی عبادت کے لئے ہوئی ہے، اس لئے ہم سب کو چاہیے کہ اپنے مذہب کا احترام کرتے ہوئے دوسرے کے مذہب کا پورا پورا خیال رکھیں.
شاہد عالم نے یہ بھی کہا کہ جو لوگ مذہب کے نام پر نفرت پھیلانے کا کام کرتے ہیں دراصل وہ انسانیت کے دشمن ہیں.
