بیرون ممالک میں پھنسے ہوئے بھارتی شہریوں کو وطن واپس لانے کی تیاریاں جاری ہیں۔ ایئر انڈیا کے ہوائی جہاز کے ذریعے 12 ممالک میں پھنسے بھارتی شہری اپنے وطن واپس لوٹیں گے۔ بیشتر ممالک کورونا وائرس کی وباء کی وجہ سے بند ہیں۔ جس کی وجہ سے ہوائی جہاز کی نقل و حرکت بند ہے۔
ایئرپورٹ ذرائع کے مطابق بھارتی حکومت نے پھنسے ہوئے بھارتی شہریوں کو بیرون ممالک سے لانے کی تیاری کرلی ہے۔ گیا ایئرپورٹ ذرائع کے مطابق چودہ ہزار سے زیادہ شہری بیرون ممالک میں پھنسے ہوئے ہیں۔ 11 مئی کو ایئر انڈیا کی پہلی پرواز سے گیا ہوائی اڈے پر انہیں لایا جائے گا۔ 8 ہزار شہریوں کو گیا ہوائی اڈے پر لانے کی تیاری کی جا رہی ہے۔ ان میں زیادہ تر ویسے افراد ہیں جو دوسرے ممالک میں کام کرنے گئے تھے۔ کچھ ایسے بھی ہیں جو گھومنے کے مقصد سے گئے ہوئے تھے اور وہ لاک ڈاون میں وہاں پھنس گئے۔
اطلاع کے مطابق ان شہریوں کی وہاں تفتیش کی جائے گی اور جس میں کورونا انفیکشن کے علامات ملیں گے انہیں آنے کی اجازت نہیں ہوگی اور ساتھ ہی بھارت پہنچنے کے بعد بھی ان کی جانچ کی جائے گی۔ آنے کے بعد یہاں 14 دن قرنطینہ میں رکھا جائے گا۔
بودھ گیا میں واقع ہوٹلوں میں ٹھہرانے کی تیاری کی گئی ہے تاہم مسافروں کو ہی ہوٹل میں ٹھہرنے کی قیمت ادا کرنا ہوگی۔ انتظامیہ اور گیا ایئرپورٹ اتھارٹی نے اس کی تیاری شروع کر دی ہے۔ بیرون ممالک سے آنے والے شہریوں کو بودھ گیا کے مختلف ہوٹلوں میں رکھنے کی تیاریاں بھی جاری ہیں۔
ضلع مجسٹریٹ ابھشیک کمار سنگھ نے کہا کہ بہار کے باشندے جو دوسرے ممالک میں پھنسے ہیں، انہیں لانے کی کارروائی شروع ہے۔ گیا کو نوڈل ضلع بنایا گیا ہے اور یہیں ہوائی اڈے پر آنے کے بعد 21 دنوں تک قرنطینہ میں بودھ گیا کے ہوٹلوں میں رکھا جائے گا۔ ہوٹل کے اخراجات آنے والے مسافر ہی برداشت کریں گے۔ انہوں نے کہا کہ تیاری پوری کرلی گئی ہیں۔
