گیا: بہار میں کورونا کی تیسری لہر کے درمیان منگل سے انٹرمیڈیٹ کا امتحان شروع ہو گیا ہے۔ دو نشستوں میں طلبہ امتحان دے رہے ہیں۔ بہار اسکول ایگزامینیشن بورڈ BSEB اور محکمہ تعلیم نے امتحان کے دوران نقل روکنے کا تمام دعویٰ کیا تھا لیکن امتحان امیدواروں پر اس کا اثر نہیں ہے۔
آج امتحان کا دوسرا دن تھا اور کئی سینٹرز کے قریب طلبہ امتحان ہال میں داخل ہونے سے قبل نقل کرنے کے لیے پرچی تیار کرتے نظر آئے، اس دوران طلبہ پرچی کو بحفاظت چھپاتے بھی نظر آئے۔
مرزا غالب کالج انوگرہ میموریل کالج میں امتحان دینے جانے سے قبل طلبہ نقل کی تیاری میں مصروف رہے۔
طلبہ پیپر کے ورق کو پرچی کی شکل دے کر جسم میں چھپا رہے تھے۔ کوئی موبائل سے تو کوئی گیس پیپر سے نقل کی پرچی بنانے میں مصروف نظر آئے۔
یہ بھی پڑھیں: Intermediate Annual Examination 2022: بہار میں انٹرمیڈیٹ امتحان کل سے، تیاری مکمل
یہاں تک کہ طلبہ کے گارجین بھی ان کے اس کام میں ساتھ نظر آئے۔ ساتھ ہی انتظامیہ کے اس دعوے اور ہدایت کی بھی قلعی کھل گئی جس ہدایت میں کہا گیا تھا کہ امتحان سینٹر کے باہر فوٹو کاپی کی دوکانیں بند رہیں گی کیونکہ کئی سینٹر کے باہر فوٹو کاپی کی دوکانیں کھلیں تھی۔
واضح رہے کہ ضلع گیا میں 65 سینٹر پر 68396 طلبہ و طالبات امتحان دیں گے۔ پہلے دن دو نشستوں میں دو طلبہ امتحان کے دوران نقل کرتے پکڑے گئے تھے جنہیں امتحان ہال کے باہر کردیا گیا۔
