بہار اسٹیٹ مدرسہ ایجوکیشن بورڈ کی طرف سے ٹیکہ کاری مہم کو کامیاب بنانے کے لیے تشہیری مہم چلائی جارہی ہے۔ مدرسہ بورڈ کا بیداری کارواں شہر گیا پہنچا ہے۔ اس ٹیکہ بیداری کارواں کو ڈی ایم نے ہری جھنڈی دکھاکر روانہ کیا۔
عالمی وبائی مرض کورونا پر کنٹرول کے لیے ٹیکہ کاری مہم کو کامیاب بنانے کی غرض سے بہار اسٹیٹ مدرسہ ایجوکیشن بورڈ کی طرف سے نکالا گیا بیداری کارواں شہر گیا پہنچا ہے، جو سبھی فرقے و طبقے کے لوگوں بالخصوص اقلیت اور مسلمانوں کے درمیان ٹیکہ کاری سے متعلق غلط فہمیوں کو دور کرنے پر کام کر رہا ہے۔
گیا کے ڈی ایم ابھیشیک کمار اور مدرسہ بورڈ کے چیئرمین عبدالقیوم انصاری نے کلکٹریٹ کے احاطے میں بیداری کارواں کو ہری جھنڈی دکھا کر روانہ کیا۔ موقع پر مدرسہ ایجوکیشن بورڈ کے چیئرمین عبدالقیوم انصاری نے کہا کہ یہ بیداری کارواں گیا ضلع میں بورڈ سے ملحق مدارس، مسلم اکثریتی آبادی والے علاقوں اور دیگر علاقوں میں پہنچ کر لوگوں کو ویکسین لینے کے لئے راغب کرے گا۔
انہوں نے کہا کہ اس کے ذریعے مختلف علاقوں میں جا کر اور پروگرام چلا کر لوگوں میں پھیلی غلط فہمیوں کو دور کرنے کا کام کیا جائے گا۔ دوسری لہر سے ہم سب نجات تو پارہے ہیں اور کورونا کے انفیکشن سے متاثرین کی تعداد میں کمی آرہی ہے لیکن امکان ہے کہ یہاں کے باشندے اگر بے احتیاطی سے کام کریں گے اور کثیر تعداد میں لوگ ویکسین نہیں لیں گے تو تیسری لہر بھی آئے گی۔
خود کو، اپنے گھروں والوں، اپنے شہر کو کورونا کی تیسری لہر سے بچانا ہے تو اس کا واحد علاج ہے ویکسینیشن۔
اس لیے مدرسہ ایجوکیشن بورڈ نے اپنی ذمہ داریوں کو پورا کرنے کی غرض سے بیداری مہم کی شروعات کی ہے اس لیے بہار کے کئی اضلاع سے ہوکر بیداری کارواں یہاں پہنچا ہے۔
مزید پڑھیں: ارریہ: عالمی یوم یوگا کے موقع پر خصوصی ویکسینیشن مہم کا انعقاد
چیئرمین عبدالقیوم انصاری نے کہا کہ اسی تناظر میں آج بہار کے وزیر اعلیٰ نتیش کمار نے ٹیکہ کاری کے لیے بڑی مہم کا آغاز کیا ہے جس میں آئندہ چھ ماہ میں چھ کروڑ بہار کے باشندوں کو ویکسین لگانے کا حدف مقرر ہے۔ وزیر اعلیٰ نتیش کمار کی اس مہم کو مدرسہ ایجوکیشن بورڈ بہار کے ہر گھر تک پہنچائے گا۔
