آج کی روزمرہ زندگی میں آئے دن خطرناک حادثے پیش آتے رہتے ہیں، ایسے وقت میں زخمیوں کو سب سے زیادہ ضرورت خون کی ہوتی ہے، لیکن بیشتر وقت خون کی کمی یا خون کی فراہمی نہیں ہونے کی وجہ سے مریض کی موت واقع ہوجاتی ہے۔اسی سلسلے میں ارریہ میں لائنس کلب تنظیم کی جانب سے خون عطیہ کیمپ کا انعقاد کیاگیا۔
اس کیمپ کا افتتاح ضلع کلکٹر بیجناتھ یادو نے کیا۔ اس کیمپ میں کل 47 لوگوں نے خون عطیہ کیا، اس کے بعد خون عطیہ کرنے والوں کو کلب کی جانب سے جوس، اسپنج مٹھائی اور سرٹیفیکیٹ بھی مہیا کرایا گیا۔
ضلع کلکٹر نے اس موقع پر کہا کہ خون عطیہ کرنا ایک نیک عمل ہے، خون عطیہ کرنے سے ضرورت کے وقت کسی کی زندگی بچائی جاسکتی ہے۔اس میں عوام کو بڑھ چڑھ کر حصہ لینا چاہیے۔
ضلع کلکٹر نے کیمپ کا معائنہ کرنے کے بعد وہاں موجود ڈاکٹروں سے خون عطیہ کرنے والوں کے بابت معلومات حاصل کی۔
ٹاؤن ڈی ایس پی کے ڈی سنگھ نے کہا کہ لوگوں کے ذہن میں ہے کہ خون عطیہ کرنے سے کمزوری ہوتی ہے جبکہ یہ صحیح نہیں ہے۔ انسان کی زندگی میں کب خون کی ضرورت کس وقت پڑ جائے کوئی نہیں جانتا، ایسے وقت میں بلڈ بینک میں جمع خون ہی لوگوں کے کام آتا ہے، خون عطیہ سبھی کو کرنا چاہیے۔
پہلی بار خون عطیہ کرنے والی اسنیہا ٹھاکر نے کہا کہ مجھے بے حد خوشی ہو رہی کہ میں آج اس کیمپ کا حصہ بن رہی ہوں۔ ہمارے چند قطرہ خون دینے سے کسی کی زندگی بچے گی اس سے بڑی بات اور کیا ہوگی۔اس کام میں خصوصی طور پر نوجوانوں کو حصہ لینا چاہیے۔
لائنس کلب ارریہ کے سکریٹری ذکی اختر انصاری نے بتایا کہ یہ کیمپ ہماری طرف سے سال میں ایک بار منعقد کیا جاتا ہے اور جو بھی خون جمع ہوتا ہے اسے صدر ہسپتال کے بلڈ بینک میں جمع کیا جاتا ہے، تاکہ ضرورت پڑنے پر اسی خون سے کسی کی زندگی بچائی جا سکے۔
اس کیمپ میں سول سرجن ڈاکٹر مدن موہن سنگھ، وارڈ کاؤنسلر سمت کمار سمن، المنار ایجوکئیر کے ڈائریکٹر عفان کامل، ڈاکٹر معیز احمد نے بھی شرکت کی اور خون عطیہ پر زور دیا۔
