اطلاعات کے مطابق گیا کے مانپور گیرے مرزاپور کے مہادیو اینکلیو پرائیوٹ لمیٹیڈ پہاڑ کھدان کے نزدیک ٹرک کی زد میں آنے سے دو افراد کی موت ہوگئی ہے۔
تاہم لواحقین نے سازش کے تحت قتل کرنے کاالزام لگایا ہے۔ اس حادثے کے بعد مقامی افراد مشتعل ہوگئے اور سیکڑوں مقامی افراد نے کھدان کے پاس جمع ہوکر احتجاج مظاہرہ کیا۔
وہیں اطلاع ملنے کے بعد مفصل تھانہ کی پولیس سمیت وزیرگنج ڈی ایس پی گھورن منڈل بڑی تعداد میں پولیس فورس لیکر پہنچے اور حالات کو قابو پانے میں کامیاب ہوگئے۔
اطلاعات کے مطابق کھدان کے باہر اونچائی پر ٹرک کو کھڑا کردیا گیا تھا ڈرائیور گاڑی میں موجود نہیں تھا، تبھی اچانک ٹرک تیزی سے نیچے اترآئی اور نیچے موجود گمٹی سے جا ٹکرائی۔ گمٹی کے پاس پانچ افراد بیٹھے تھے جس میں دو افراد اس کی زدمیں آگئے اور انکی موت ہوگئی۔
مقامی باشندوں نے حادثہ میں ہلاک ہونے والے دونوں افراد کے لواحقین کومعاوضہ دینے اور کھدان کو بند کرنے کی مانگ کی ہے۔
ادھر ہلاک شدہ افراد کی شناخت جہان آباد ضلع کے کاکو اور دوسرا اتری ضلع گیا کے باشندے کے طورپر ہوئی ہے۔ دونوں افراد کھدان ہی میں کام کرتے تھے۔
ڈی ایس پی گھورن منڈل نے کہا کہ یہ حادثہ لاپروائی کی وجہ سے پیش آیا ہے۔ پولیس اس معاملے کی تحقیقات کررہی ہے۔
