بہار کے وزیراعلی نتیش کمار نے آج میڈیا سے بات کرتے ہوئے بتایا کہ ریاست میں کورونا ٹیکہ کاری کے سلسلہ میں تمام تیاریوں کو مکمل کر لیا گیا اور بہت جلد پہلے مرحلہ کے تحت طبی عملے کے ارکان کو ٹیکہ لگایا جائے گا۔
انہوں نے بتایا کہ طبی عملے کے بعد پولیس اہلکاروں کو ترجیح دی جائے گی جس کے بعد عوامی نمائندوں اور تمام سرکاری ملازمین کو ویکسین دی جائے گی۔
نتیش کمار نے کہا کہ دوسرے مرحلہ کے تحت ریاست کے مختلف علاقوں کے 50 سال سے زائد عمر کے افراد کو ٹیکہ لگایا جائے گا۔ انہوں نے کہا کہ مرکزی حکومت نے ملک بھر میں ٹیکہ کاری کے لیے مناسب انتظامات کئے ہیں۔ اسی طرح ریاستی حکومت نے بھی اپنے طور پر تیاریاں مکمل کرلی ہیں۔
انہوں نے انتظامات کی تفصیل بتاتے ہوئے کہا کہ ریاست میں ضرورت کے مطابق کورونا ویکسین کےلیے کولڈ اسٹوریج کا انتظام کیا گیا ہے اور ویکسین کو مختلف مقامات پر بھیجنے کےلیے بھی تمام تر تیاریاں مکمل کرلی گئی ہیں۔ بہار کے وزیراعلیٰ نے عوام کو اپنے طور پر احتیاط برتنے کا بھی مشورہ دیا۔
قبل ازیں صحت اور خاندانی بہبود کے مرکزی وزیر مملکت اشونی کمار چوبے نے کہا تھا کہ بہار کو پہلے مرحلے کے تحت کووڈ۔19 ویکسین کی سات لاکھ ڈوز جبکہ دوسرے مرحلے میں ایک کروڑ ڈوز فراہم کی جائے گی۔
