ریاست کی نائب وزیر اعلی رینو کشواہا جمعرات کو گیا کے دورہ پر پہنچی تھیں، یہاں انہوں نے ایک نجی پروگرام میں شرکت کے بعد کہا کہ بہار میں جتنے جرائم کے دعوے کیے جارہے ہیں اتنے نہیں ہیں، پٹنہ میں آج ہی ایک لڑکی کے قتل کے معاملے پر انہوں نے کہا کہ واردات کون انجام دیتا ہے کس وجہ سے دیتا ہے یہ تو پتہ نہیں لیکن مجرموں کی گرفتاری یقینی ہوتی ہے۔
پٹنہ میں ہوئے روپیش قتل معاملے پر انہوں نے کہا کہ پولیس نے اس قتل معاملے کا انکشاف تو کرلیا ہے، تاہم جلد ہی مجرم بھی پولیس کی گرفت میں ہوں گے، حالانکہ انہوں نے بہار میں بڑھتے جرائم پر تو زیادہ کچھ نہیں بولا لیکن انہوں نے میڈیا کو وارداتوں پر زیادہ طول دینے سے پرہیز کرنے کی نصیحت دی۔
انہوں نے کہا کہ میڈیا کارول بہتر ہونا چاہیے ہماری حکومت کو بدنام کرنے کی سازش کی جا رہی ہے، اس دوران انہوں نے بہار این ڈی اے میں کابینہ کی توسیع میں تاخیر پر کہا کہ سب کچھ ٹھیک ٹھاک ہے، وقت پر توسیع ہوگی۔
این ڈی اے میں رسہ کشی سے انکار کرتے ہوئے انہوں نے کہا کہ وزیر اعلیٰ نتیش کمار این ڈی اے کے رہنما ہیں اور ان کی قیادت میں پانچ سالوں تک بہتر ڈھنگ سے حکومت چلے گی۔
ساتھ ہی انہوں نے گیا سے پٹنہ تک خراب سڑک کے معاملے پر کہا کہ نتیش کمار کی حکومت میں بہار میں سڑکوں کی جال بچھائی گئی ہے، گیا سے پٹنہ تک فور لین کا کام تیزی سے مکمل کرنے کی ہدایت دی گئی ہے ان کی حکومت کا ٹارگیٹ ہے کہ بہار کے کسی بھی ضلع سے دارالحکومت پٹنہ پہنچنے میں صرف چار گھنٹے کا وقت لگے۔
