'بہار ایک اعلیٰ رہنما سے محروم ہو گیا'

بہار کے سابق وزیراعلی جگن ناتھ مشرا کا 82 برس کی عمر میں دہلی کے ہسپتال میں انتقال ہو گیا۔

بہار کے سابق وزیراعلیٰ ڈاکٹر جگن ناتھ مشرا کے انتقال پر ایک جانب جہاں پورے بہار میں غم کا ماحول ہے تو دوسری جانب ڈاکٹر مشرا کے انتقال پر ارریہ کی عوام بھی غمگین ہیں اور ان کی مدت میں ہوئے کام کو یاد کر انہیں خراج تحسین پیش کر رہے ہیں۔

ارریہ کے موجودہ رکن پارلیمان و بھارتیہ جنتا پارٹی کے رہنما پردیپ کمار سنگھ نے جگن ناتھ مشرا کے انتقال کو اپنا ذاتی خسارہ بتاتے ہوئے کہا کہ 'ڈاکٹر مشرا کی شخصیت اور بہار کے لیے ان کے ذریعہ کیے گئے کاموں کو ہمیشہ یاد رکھا جائے گا۔'

انہوں نے کہا کہ 'یہ میری خوش قسمتی ہے کہ مجھے ان کے ساتھ کام کرنے کا موقع ملا اور انہوں نے ہمیشہ بہار کی تعمیر و ترقی کے بارے میں سوچا، وہ پارٹی سے اوپر اٹھ کر لوگوں سے تعلقات رکھتے تھے، کسی بھی پارٹی کا رہنما ان سے ملنے جاتا تو اسی طرح عزت سے پیش آتے جیسے ان کی ہی پارٹی کا ہو۔'

پردیپ کمار سنگھ نے کہا کہ 'ارریہ ضلع ان کے دور اقتدار میں ہی یعنی سنہ 1990 میں ضلع بنا تھا، ان ہی کی کوششون کا ثمرہ تھا کہ ارریہ کو علاحدہ ضلع بنا کر یہاں کی معاشی، اقتصادی اور تعلیمی شرح کو بڑھانے پر توجہ دی گئی تاکہ یہاں کے عوام ایک بہتر اور خوش حال زندگی گزار سکیں۔'

پردیپ کمار نے کہا کہ 'ارریہ ضلع سے جگن مشرا کا گہرا لگاؤ تھا، وہ یہاں کے لوگوں سے بے حد محبت رکھتے تھے۔ ان کے انتقال پر پورا بہار غم کے ماحول میں ہے اور بہار نے ایک اعلیٰ رہنما کو کھو دیا ہے۔'