ریاست بہار کے بھاگلپور کی تاریخی برہپورہ مسجد میں سینکڑوں نمازی جمعہ کی نماز ادا کرتے ہیں لیکن اس دفعہ لاک ڈاؤن کی وجہ سے جمعۃ الوداع کے موقع پر بھی مسجد ویران رہیں اور چند لوگوں نے ہی مسجد میں نماز ادا کی۔
اسی طرح خانقاہ شہبازیہ، پیر دمڑیا شاہ، تاتارپور کی جامع مسجد گویا شہر کی سبھی مسجدوں میں سناٹا چھایا رہا اور لوگوں نے اپنے اپنے گھروں پر نماز ظہر ادا کی لیکن اب عید کی نماز کو لے کر لوگوں کا دل بیٹھا جا رہا ہے۔
مسلمانوں کا ماننا ہے کہ سماجی دوری کی شرط کے ساتھ ہی صحیح لیکن ضلع انتظامیہ کو عید کی نماز ادا کرنے کی سہولت دینی چاہیے کیونکہ یہ موقع سال میں ایک بار آتا ہے۔
اسلامی عقیدے کے مطابق حضرت محمد صلی اللہ علیہ وسلم کا ارشاد گرامی ہے کہ 'جمعۃ المبارک کا دن سید الایام ہے اور تمام دنوں سے افضل و برتر ہے لیکن کورونا کی وجہ سے لوگوں کو مسجدوں میں عبادت کا موقع نہیں ملا اور عید کا و جوش و خروش بھی نہ تو روزے داروں میں ہے اور نہ ہی بازاروں میں ہے گویا اس بیماری نے زندگی کے نظام کو درہم برہم کرکے رکھ دیا ہے۔
