بھبھوا پولیس میں ایک خاتون کے اغوا کی شکایت اس کے شوہر نے درج کرائی تھی جس کے بعد پولیس نے تحقیقات کا آغاز کیا اور کارروائی کرتے ہوئے خاتون اور اس کے دو بچوں کو ڈھونڈ نکالا۔
سیتامڑھی اور بھبھوا پولیس کی مشترکہ کارروائی میں خاتون کے علاوہ اغوا کرنے والے تین بچوں کے باپ کو بھی گرفتار کر لیا گیا۔ بھبھوا کی وی آئی پی کالونی میں یہ دونوں تقریباً تین ماہ سے روپوش تھے۔
قبل ازیں سیتامڑھی کے رامپور میں رہنے والے چندن کمار نے اپنی اہلیہ کو اغوا کر لیے جانے کی پولیس میں شکایت درج کرائی تھی اور کنہولی کے رہنے والے رام کشور مہتو پر خاتون کو اغوا کرنے کا الزام لگایا تھا۔
رام کشور مہتو، خاتون کے بھائی کا ٹریکٹر چلایا کرتا تھا اور دونوں میں محبت ہوگئی تھی جبکہ شوہر چندن کمار حیدرآباد میں ملازم تھا اور اس کی اہلیہ للیتا کماری والدین کے ساتھ رہتی تھی۔
کچھ دن قبل رام کشور مہتو اور للیتا کماری، گھر چھوڑ کر چلے گئے اور دونوں بھبھوا میں رہ رہے تھے۔ پولیس نے موبائل لوکیشن کی مدد سے دونوں کو گرفتار کر لیا۔ اس کارروائی میں پولیس سب انسپکٹر رویندر کمار، بھبھوا پولیس اسٹیشن کے سنتوش کمار پانڈے کے علاوہ خاتون کانسٹیبل مدھو کماری نے حصہ لیا۔
بعدازاں ملزم رام کشور مہتو اور للیتا کو گرفتار کر لیا اور سیتامڑھی پولیس اسٹیشن منتقل کیا گیا۔
