شہر گیا کے اقبال نگر میں واقع کربلا میں تمام مذاہب کے عقیدت مندوں کی بھیڑ ہوتی ہے ۔تاہم ان دنوں کورونا وائرس کے خطرے سے عقیدت مندوں کو محفوظ رکھنے کے لیے کربلا انتطامیہ نے سبھی احتیاطی قدم اٹھائے ہیں۔
یہاں آنے والے لوگوں کے ہاتھ دھلوانے کے بعد انھیں سینیٹائزر لگوایاجارہا ہے اس کے ساتھ ہی پورے کربلا کے احاطہ کو سینیٹائز کیا جارہا ہے، اگر یہاں مجمع ہوتا ہے تو انھیں علیحدہ علیحدہ کھڑے رہنے کو کہا جاتا ہے۔ فی الحال یہاں عقیدت مندوں کی آمد میں کافی کمی واقع ہوئی ہے۔
خاص بات یہ ہے کہ وزارت صحت کی جانب سے کورونا وائرس کے بارے میں جاری کردہ مشورے کے بعد کربلا میں خصوصی نگہداشت کی جارہی ہے اور صفائی پر خصوصی توجہ دی جارہی ہے۔
کربلا انتظامیہ کے منتظم ڈاکٹر سید شاہ شبیر عالم قادری نے بتایا کہ یہاں آنے والے زائرین کے لیے ہاتھ دھونے اور سینیٹائزر کا انتظام کیا گیا ہے اس کے بعد ہی کوئی عقیدت مند اندر جاسکتا ہے۔
انہوں نے بتایا کہ جمعہ کو عام دنوں سے زیادہ بھیڑ ہوتی ہے اسی کے مد نظر یہ ہدایت دی گئی ہے کہ عقیدت مند اپنے درمیان کم از کم 1 میٹر کا فاصلہ برقرار رکھیں گے، یہاں اس خطرناک وباء کے خاتمے کی خصوصی دعائیں کی جارہی ہیں۔
شبیر عالم نے کہا کہ 'دوا کے ساتھ دعا بھی ضروری ہے تاہم محکمہ صحت و حکومت کی ایڈوائزری کے تحت سبھی کاموں کوانجام دیا جارہا ہے اور احتیاطی قدم مذہبی مقامات پر بھی اٹھایا جانا لازمی ہے۔
