'موجودہ سائنسی تقاضوں کے مطابق نئی۔نئی تحقیقات ہو'

بہار کے گورنر اور چانسلر پھاگو چوہان نے کہاکہ آج کا زمانہ سائنس کا زمانہ ہے اور اس کے تقاضوں کے مطابق نئی ۔ نئی تحقیقات ہونی چاہئے ۔ جس سے کہ تعلیمی معیار کا فروغ ہوگا۔

مسٹر چوہان نے للت نارائن متھلا یونیورسیٹی کے دسویں یوم اسناد تقریب کو خطاب کرتے ہوئے کہا کہ تعلیم صرف نوکری کیلئے ضروری نہیں ہے بلکہ اس سے انسان میں حساسیت اور اخلاقیات کا فروغ ہوتاہے۔ سماج کے محروم ، دلت اور پسماندہ طبقات کو ترقی کے مین اسٹریم میں لانا بھی بہت ضروری ہے۔

انہوں نے کہا کہ متھلا بھارت کا ایک خوشحال تہذیبی علاقہ ہے ۔ یہ سرزمین فلسفیوں کی سرزمین ہے۔ جنک ، ودیاپتی اور دنکر اور ناگارجن کی فخریہ سرزمین ہے۔

چانسلر نے علم ، کام اور وسائل کی اس پاک سرزمین کا تذکرہ کرتے ہوئے کہاکہ سال 2019 میں ہی دو دو تقسیم اسناد تقریب کا انعقاد یونیورسیٹی کی زندہ دلی کا ثبوت ہے۔ انہوں نے دسویں تقسیم اسناد تقریب کی مبارک باد پیش کرتے ہوئے کہا کہ تعلیم طلبا و طالبات کی زندگی کے مسلسل سفر کا ادبی پہلو ہے۔ آج تقسیم اسناد تقریب ہو رہی ہے ۔ کتابوں کا علم آپ کو حاصل ہو چکا ہے اب آپ کو عملی زندگی میں اہم کردار نبھانا ہے۔