ریاست بہار کے ضلع دربھنگہ میں لاک ڈاؤن کے سبب خراب معاشی حالات سے پریشان ہو کر ایک شخص نے خودکشی کرلی۔
اطلاعات کے مطابق ببلو بھنڈاری نامی شخص کل رات اپنے گھر والوں کے ساتھ کھانا کھا کر گھر میں سونے چلا گیا، شدید گرمی کے سبب اہل خانہ کے دیگر افراد آنگن میں ہی سو گئے، صبح جب کافی دیر تک ببلو بھنڈاری اپنے کمرے سے باہر نہیں نکلا تو گھر والوں نے ببلو کو آواز دی، لیکن کوئی جواب نہیں آیا، کچھ دیر بعد لوگوں نے کھڑکی سے جھانک کر دیکھا تو ببلو بھنڈاری کی لاش پنکھے سے لٹکی نظر آئی۔
واضح رہے کہ ببلو بھنڈاری آٹو ڈرائیور تھا اور کسی طرح سے اپنے اہل خانہ کا گزر بسر کرتا تھا لیکن ملک میں نافذ لاک ڈاؤن کے سبب اس کے معاشی حالت خراب ہوگئے تھے اور آٹو رکشہ بھی ضبط ہوگیا تھا جس سے وہ پریشان چل رہا تھا ۔
مقامی لوگوں کے اطلاع پر جائے وقوع پر پہنچی پولیس نے لاش کو اپنے قبضے میں لے کر ضلع ہسپتال پوسٹ مارٹم کے لئے بھیج دیا اور معاملے کی تحقیقات شروع کر دی، اس دوران مقامی لوگوں نے انتظامیہ سے ببلو کے اہل خانہ کو معاوضہ دینے کی بھی اپیل کی ہے۔
