اطلاعات کے مطابق گزشتہ ایک ماہ میں ارریہ ضلع میں سترہ لوگوں کا قتل ہوا ہے جو ضلع انتظامیہ کے دعویٰ کی قلعی کھول رہی ہے۔
ارریہ کے رانی گنج تھانہ حلقہ کے نگراہی گاؤں میں گزشتہ شب اپنے ہی گاوں میں میلہ دیکھنے آئے پرکاش کمار عرف بابا جی عمر (18 سال) کو جرائم پیشہ افراد نے گولی مار کر ہلاک کر دیا ۔
پرکاش کمار نگراہی گاؤں کے وارڈ نمبر 11کے باشندے کیول یادو کا بیٹا ہے۔اطلاع موصول ہوتے ہی رانی گنج پولیس نے جائے وقوع پر پہنچ کر لاش کو پوسٹ مارٹم کے لیے ارریہ صدر ہسپتال بھیج دیا۔
مقتول پرکاش کمار کے بھائی جیون کمار نے بتایا کہ میلہ میں مورتی وی سرجن کے دوران بھائی سے میلہ کے مالک ستن یادو سے بحث اور ہاتھاپائی بھی ہوئی تھی۔ واقعہ کے بعد دونوں فریق کو بیٹھا کر معاملہ ختم کرا دیا گیا تھا، اس کے بعد رات گیارہ بجے پھر دوبارہ سے پرکاش یادو اپنے کچھ دوستوں کے ساتھ میلہ میں گیا اور دوبارہ مارپیٹ شروع ہو گئی۔
مقتول کے بھائی للن یادو کا الزام ہے کہ جب وہ اپنے بھائی کو دوبارہ میلہ سے واپس گھر کی طرف لے جا رہا تھا تبھی ستن یادو، ببلو یادو ،گپو یادو ،منوج یادو اور راہل یادو وغیرہ نے اپنے لوگوں کے ساتھ انہیں گھیر کر پرکاش یادو کے پیٹ میں ایک گولی ماری، جس سے پرکاش زمین پر گر پڑا، اور پھر اسی وقت دوسری گولی ماری۔ اس کے بعد وہ لوگ وہاں سے فرار ہو گئے۔
للن نے کہا کہ وہ کسی طرح سے وہاں سے جان بچا کر بھاگ گیا۔ گولی لگنے سے پرکاش کی موت موقع پر ہی ہو گئی۔ اس واقعہ سے گاؤں میں کہرام مچا ہوا ہے۔
ایس ڈی پی او کمار دیوندر سنگھ نے کہا کہ آپسی دشمنی میں اس واقعہ کو انجام دینے کی بات سامنے آئی ہے۔ چھ لوگوں کی نشاندہی مقتول کے بھائی نے کی ہے جس کی گرفتاری کے لیے چھاپہ ماری کی جا رہی ہے۔ معاملے کے بعد مقتول کے گھر پر پولیس کیمپ کر رہی ہے۔
