شمالی کشمیر کے ضلع بارہمولہ کے تحصیل ہیڈ کوارٹر سوپور میں چند روز قبل عسکریت پسندوں نے کونسلروں پر حملہ کیا تھا جس میں ایک ایس پی اور دو کونسلر کی موت ہوگئی تھی۔ اس کے بعد حملہ آوروں کی گرفتاری کے لیے سوپور پولیس، 22 آر آر فوج اور سی آر پی ایف کی مشترکہ ٹیم نے بڑے پیمانے پر تلاشی مہم شروع کردی جس میں بڑی کامیابی ملی ہے۔
ایس پی سوپور نے بتایا کہ سوپور حملہ میں ایک مقامی عسکریت پسند مدثر پنڈت اور دوسرا غیر مقامی شخص ملوث تھا۔ اس کی تحقیق و تفتیش کے بعد سوپور پولیس نے مذکورہ عسکریت پسندوں سے تعلق رکھنے کے الزام میں چھ افراد کو گرفتار کیا ہے جن کی تحویل سے ایک موٹر سائیکل اور ایک ہلمیٹ بھی برآمد کیا ہے۔
واضح رہے کہ 29 مارچ کو دوپہر تقریباً 1:10 بجے ایس ڈی ایچ سوپور کے قریب میونسپل کونسلرز پر حملہ گیا۔ اس کے نتیجے میں میونسپل کونسلر ریاض احمد پیر، شمس الدین پیر اور پولیس اہلکار شفقت نذیر زخمی ہو گئے تھے، تاہم بعد میں تینوں زخموں کی تاب نہ لا سکے اور ان کی موت ہوگئی تھی۔
