ضلع بارہمولہ کے تحصیل رفیع آباد میں اس وقت لوگوں کے اندر تشویش کی لہر دوڑ گئی جب یہ بتایا گیا کہ ایس ڈی ایم کا دفتر وتر گام علاقے میں تعمیر کیا جائے گا۔
مقامی باشندوں کے مطابق حکومت نے اس سے قبل حدی پورہ میں رفیع آباد ایس ڈی ایم دفتر قائم کرنے کا وعدہ کیا تھا۔
انہوں نے دعویٰ کیا کہ رفیع آباد تحصیل میں حدی پورہ ہی ایس ڈی ایم دفتر کے لیے موزوں جگہ ہے کیونکہ یہ تحصیل کے وسط میں ہے جس سے ہر ایک کو یہاں پہنچنے میں آسانی ہوگی۔
سول سوسائٹی ممبران نے ذرائع ابلاغ کے نمائندوں سے بات کرتے ہوئے کہا: ’’رفیع آباد ایس ڈی ایم دفتر کی تعمیر حدی پورہ کے بجائے دوسرے کی علاقے میں کرنا یہاں کی عوام کے جذبات کے ساتھ کھلواڑ کے مترادف ہے۔‘‘
انہوں نے کہا کہ رفیع آباد کی عوام کے لیے حدی پورہ ہی ایس ڈی ایم دفتر کے لیے موزوں جگہ ہے تاہم ’’اگر اس دفتر کو کہیں اور تعمیر کرنے کا منصوبہ کیا جا رہا ہے تو عوام مجبوراً سڑکوں پر اُتر آنے کے لیے مجبور ہوگی۔‘‘ اس حوالے سے انہوں نے لیفٹینٹ گورنر جی سی مرمو سے بھی مداخلت کی اپیل کی ہے۔
