شمالی کشمیر کے ضلع بارہمولہ کے تحصیل ہیڈکواٹر سوپور قصبہ میں ڈاکٹر کی مبینہ غفلت کی وجہ سے ایک بچہ ماں کی پیٹ میں انتقال کرگیا۔ جس کی وجہ سے علاقہ میں تشویش کی لہر دوڑ گئی ہے۔
اس حوالے سے بچہ کے لواحقین نے سوپور زچہ بچہ ہسپتال کے خلاف زور دار احتجاج درج کیا۔ انہوں نے میڈیا نمائندوں سے بات کرتے ہوئے الزام عائد کیا کہ ڈاکٹروں کی لاپروائی کی وجہ سے ان کے بچہ کی موت واقع ہوئی جبکہ انہوں نے ایمرجنسی میں اپنی بیٹی کو ایک پرائیویٹ ہسپتال میں داخل کر کے اس کی جان بچائی۔
انہوں نے کہا کہ ہسپتال انتظامیہ سے اپیل کی ہے کہ مبینہ لاپروائی میں ملوث ڈاکٹروں کے خلاف کارروائی کی جائے۔
انہوں نے دعویٰ کیا کہ سوپور میں اکثر ایسے واقعات پیش آتے ہیں جب آخری لمحہ میں حاملہ خاتون کو نجی ہسپتال منتقل ہونے کا مشورہ دیا جاتا ہے۔
انہوں نے کہا کہ آٹھ ماہ تک حاملہ خاتون کا علاج سرکاری ہسپتال میں ڈاکٹروں کی نگرانی میں ہوتا ہے لیکن نویں ماہ میں انہیں نجی ہسپتال کا رخ کرنے پر مجبور کیا جاتا ہے۔
جب میڈیا کے نمائندوں نے بی ایم او سوپور ذو الفقار احمد سے یہ سوال کیا تو انہوں نے کہا کہ اس معاملے کے حوالے سے ایک ٹیم تشکیل دی جائے گی اور جو بھی اس میں ملوث پایا جائے گا اس کے خلاف سخت سے سخت کارروائی کی جاے گی۔
