شمالی کشمیر کے ضلع بارہمولہ کے سوپور میں ایک 28 سالہ مشتبہ منشیات فروش نے مبینہ طور پر پولیس اسٹیشن کے لاک اپ کے اندر خودکشی کی ہے۔
ذرائع نے ہلاک شدہ کی پہچان زمرد احمد گوجری ولد غلام محمد گوجری ساکنہ ہیگام کے طور پر کی ہے۔
ذرائع کے مطابق ہلاک شدہ کو بدھ کی شب لاک اپ میں مردہ پایا گیا۔ اسے مقامی ہسپتال منتقل کیا گیا جہاں ڈاکٹروں نے اسے مردہ قرار دیا۔
اس کو پولیس کی ایک ٹیم نے گذشتہ ہفتے بھاری مقدار میں غیر قانونی منشیات کے ساتھ گرفتار کیا تھا۔
اس کے خلاف کیس درج کر کے حراست میں رکھا گیا تھا۔
یہ بھی پڑھیں:سوپور مبینہ حراستی ہلاکت: میجسٹیریل انکویری میں تاخیر
واضح رہے کہ اس سے قبل بھی سوپور قصبہ کی صدیق کالونی کے رہائشی عرفان احمد ڈار کو جموں و کشمیر پولیس نے پندرہ ستمبر کو حراست میں لیا تھا اور اس کے بعد اس کی لاش تجر شریف گاؤں میں پائی گئی تھی۔
اس پر الزام تھا کہ وہ عسکریت پسندوں کا معاون تھا۔ تاہم گھر والوں نے ان الزامات کو مسترد کر دیا تھا۔
