ضلع بارہمولہ کے سوپور قصبہ میں جمعہ کو میگری پورہ سے آئے ہوئے لوگوں نے محکمہ بجلی کے دفتر کے سامنے احتجاج کیا اور سڑک پر دھرنا دیکر نعرے بازی کی۔
احتجاج کے سبب ٹریفک کی نقل و حمل کئی گھنٹوں تک متاثر رہی۔
احتجاج کر رہے لوگوں نے محکمہ بجلی اور ضلع انتظامیہ پر انکے علاقے کو جان بوجھ کر نظر انداز کرنے کا الزام عائد کیا ہے۔
ای ٹی وی بھارت کے ساتھ بات کرتے ہوئے احتجاجی مظاہرین کا کہنا تھا کہ ’’ہمیں سخت سردیوں کے ایام میں بجلی جیسی بنیادی ضرورت سے محروم رکھا گیا ہے اور محکمہ بجلی کے اعلی افسران ٹس سے مس نہیں ہو رہے ہیں۔‘‘
احتجاج کر رہے لوگوں نے بتایا کہ وہ اپنی شکایت لیکر ایگزیکٹو انجینئر محکمہ بجلی کے دفتر گئے تاہم وہاں کوئی بھی اعلیٰ افسر موجود نہ ہونے کے سبب انہیں مایوسی کا سامنا کرنا پڑا۔ انہوں نے مزید کہا کہ وہ سپرانٹنڈنٹ انجینئر کے دفتر بھی گئے تاہم ’’وہاں بھی بجلی محکمہ کا کوئی افسر موجود نہیں تھا اور ہمیں خالی ہاتھ واپس لوٹنا پڑا۔‘‘
انہوں نے دعویٰ کہا کہ ضلع انتظامیہ سمیت محکمہ بجلی کے اعلیٰ افسران کی نوٹس میں کئی مرتبہ معاملے لائے جانے کے باوجود انہیں ’’ہر بار مایوسی کا سامنا کرنے کے بعد آج ہم احتجاج کرنے پر مجبور ہو گئے۔‘‘
احتجاجی مظاہرین کا کہنا تھا کہ تعلیمی ادارے بند ہونے کے سبب بچے آن لائن ہی پڑھائی کر رہے ہے، تاہم بجلی نہ ہونے کے سبب وہ موبائل فون چارج کرنے سے قاصر ہیں جس کی وجہ سے طلباء کی پڑھائی بھی متاثر ہو رہی ہے۔
مظاہرین نے ضلع انتظامیہ سمیت محکمہ بجلی سے انکے علاقے میں جلد بجلی بحال کرنے کا مطالبہ کیا۔
