بانڈی پورہ: محکمہ سوشل فارسٹری کی جانب سے جموں و کشمیر کے طول و ارض خصوصاً وادی کشمیر اور خطہ چناب میں شجر کاری مہم کا سلسلہ سردیاں ختم ہونے کے ساتھ ہی پھر سے شروع کر دیا گیا ہے۔ منگل کو شمالی کشمیر کے بانڈی پورہ ضلع میں محکمہ جنگلات کی جانب سے گورنمنٹ ہائی اسکول لہروال پورہ میں کئی پودے لگائے گئے، جس میں محکمہ کے عملہ، مقامی پی آر آئی ممبران سمیت تعلیمی ادارہ کے طلبہ و طالبات اور عملہ نے بھی شرکت کی۔
شجر کاری مہم میں شریک مقامی ڈی ڈی سی چیئرپرسن، کوثر شفیق نے میڈیا نمائندوں کے ساتھ بات کرتے ہوئے کہا کہ شجر کاری مہم کے ساتھ ساتھ اس کی اہمیت و افادیت کے حوالہ سے سبھی آگاہی فراہم کی جا رہی ہے۔ انہوں نے کہا کہ شجر کاری مہم میں شرکت کے ساتھ ساتھ جنگلات کا تحفظ بھی ہم سب پر لازم ہے۔ انہوں نے مقامی باشندوں خاص کر طلبہ سے اس طرح کی مہم میں مستقبل میں بھی شرکت کرنے کی اپیل کی۔
ادھر، محکمہ سوشل فارسٹری، بانڈی پورہ، کے رینج آفیسر بلال احمد متو نے شجر کاری مہم کے حوالہ سے تفصیلات فراہم کرتے ہوئے کہا کہ رواں برس ضلع بانڈی پورہ میں ایک لاکھ پودے لگانے کا ٹارگٹ مقرر کیا گیا ہے۔ انہوں نے کہا کہ جنگلاتی اراضی کے علاوہ پبلک پارکس، اسکولوں اور سرکاری اداروں میں بھی شجر کاری مہم کو پروموٹ کیا جا رہا ہے جبکہ محکمہ نجی اداروں، این جی اوز سمیت ذاتی طور شجر کاری مہم انجام دینے والوں کو مفت پودے فراہم کیے جا رہے ہیں۔
مزید پڑھیں: IUST Plantation Drive: اسلامک یونیورسٹی اونتی پورہ میں شجرکاری مہم
واضح رہے کہ محکمہ سوشل فارسٹری کی جانب سے لہروال پورہ کے جس علاقے میں شجر کاری مہم انجام دی گئی وہ معروف جھیل ولر کے کنارے آباد ہے۔ اس علاقہ میں حالیہ چند برسوں کے دوران WUCMA ولر کنزرویشن منیجمنٹ اتھارٹی کی جانب سے ہزاروں پودے کاٹے گئے ہیں۔
