ضلع بانڈی پورہ کے ایک دور دراز گاؤں ویون سے تعلق رکھنے والی ایک حاملہ خاتون کو اس کے اہل خانہ نے ہفتہ کی صبح دردِ زہ میں مبتلا ہونے کے بعد بانڈی پورہ ڈسٹرکٹ اسپتال پہنچایا۔ تاہم کورونا وائرس سے متاثرہ اس خاتون کو مبینہ طور پر اسپتال میں داخل ہونے سے روکا گیا اور مشورہ دیا گیا کہ وہ کووڈ اسپتال کا رخ کریں۔ اس دوران مذکورہ خاتون نے اسپتال گیٹ کے سامنے ہی بچی کو جنم دیا۔
حاملہ خاتون کے اہل خانہ نے الزام عائد کیا کہ انہوں نے ڈاکٹروں سے منت سماجت کی کہ حاملہ خاتون کا علاج کیا جائے لیکن اہل خانہ کے مطابق ڈاکٹروں نے اسے محض اس وجہ سے اسپتال میں داخل ہونے سے روکا کہ وہ کورونا وائرس سے متاثرہ ہیں۔
میڈیکل سپرنٹنڈنٹ ڈسٹرکٹ ہسپتال بانڈی پورہ نے لاپروائی کے الزامات کی تردید کرتے ہوئے کہا ہے کہ کووڈ اسپتال حاجن میں ہے اور متعلقہ ڈاکٹروں نے اسے حاجن ریفر کر دیا تھا اور صرف چند ہی منٹوں میں جب وہ ایمبولینس کے منتظر تھے، خاتون نے اسپتال کے گراؤنڈ میں ہی بچی کو جنم دیا۔
’’مجرمانہ غفلت اور غیر انسانی حرکت‘‘ کے اس افسوسناک واقعے کے خلاف اسپتال میں موجود لوگوں نے احتجاج کرتے ہوئے میڈیکل افسر کے خلاف کارروائی کرنے کا مطالبہ کیا ہے۔
ادھر چیف میڈیکل آفیسر بانڈی پورہ ڈاکٹر بشیر احمد خان نے ای ٹی وی بھارت کو فون پر بتایا کہ وہ اس سلسلے میں جلد کارروائی کریں گے۔
انہوں نے اس حوالے سے ایک تحریری حکمنامہ جاری کرتے ہوئے میڈیکل افسر کے نام وجہ بتاؤ نوٹس جاری کیا ہے۔
