لیبر یونین بانڈی پورہ اور سینٹر آف ٹریڈ یونین بانڈی پورہ نے لیفٹنٹ گورنر انتظامیہ سے 2018سے اسکالر شپ کے بقایہ جات کو واگزار کرنے کا مطالبہ کیا ہے۔
انہوں نےکہا کہ چیف ایکزیکٹیو افسر سیکریٹری جے اینڈ کے، بلڈنگ اینڈ روڈ کنسٹرکشن ورکرس ویلفیئر بورڈ نے رنیول (Renewal) کی تاریخوں میں توسیع کرکے انہیں کسی حد تک راحت فراہم کی تھی تاہم ساتھ ہی دوسرا حکمنانہ اجراء کرکے انہوں نے اس پسماندہ طبقے کی مشکلات میں مزید اضافہ کیا ہے۔
دوسرے حکمنانے کے مطابق ضلع افسران کو ہدایات دی گئی ہیں کہ جن افراد یا لیبرس نے مقررہ وقت پر اپنی رجسٹریشن یا فارم رنیو نہیں کرائے ہیں ان کے حق میں اسکالرشپ واگزار نہ کی جائے، تاہم لیبرس اور ان کی یونین کے مطابق کورونا وائرس کے باعث وہ مقررہ وقت پر اپنے لیبر کارڈس کو رنیو نہ کر سکے۔
ان کا کہنا ہے کہ اس سلسلے میں کئی بار انہوں نے متعلقہ دفاتر کا رخ توکیا تاہم کووڈ19 کی وجہ سے دفاتر اکثر کھالی پڑے رہتے تھے۔
انہوں نے الزام عائد کرتے ہوئے کہا کہ ’’ضلع افسران کے پاس اس (اسکالرشپ) کے لئے مختص رقومات جمع ہیں تاہم سی ای او کے جاری کردہ اس نئے حکمنامے کے تحت ضلع افسران یہ رقومات مطلوبہ افراد تک پہنچانے سے قاصر ہیں۔‘‘
انہوں نے لیفٹیننٹ گورنر انتظامیہ سے مداخلت اور 2018سے بقایہ واجبات کو واگزار کرنے کی اپیل کی ہے تاکہ ضلع کے پسماندہ طبقے کو راحت پہنچ سکے۔
