شمالی کشمیر بانڈی پورہ ضلع کے حاجن کے بنگر محلہ میں جمعرات کی صبح ایک 80 سالہ شخص دریائے جہلم میں اس وقت ڈوب گیا جب وہ اپنے گھر سے وضو کرنے کے لئے دریا پر گیا۔
مقامی لوگوں کے مطابق یہ شخص دریا پر وضو بنانے کا عادی تھا تاہم آج صبح جب وہ فجر کی نماز کے لئے وضو کرنے کے غرض سے گیا تو دیر تک گھر واپس نہیں لوٹا جس سے اس کے اہل خانہ کو شبہ ہوا جس کے بعد گھر والے دریا کے کنارے پہنچے تو وہاں انہوں نے اس کی ٹارچ اور کچھ کپڑے پائے۔
اس بارے میں پولیس کو اس کی اطلاع دی گئی جس کے بعد پولیس کی ایک ٹیم نے فوراً ان کی تلاش شروع کردی۔ تاہم بعد میں مذکورہ شخص کی لاش چندرگیر بانیاری میں دریا سے بر آمد کی گئی۔
یہ بھی پڑھیں: بانڈی پورہ: خوانچہ فروشوں کے لیے آگہی پروگرام کا انعقاد
حاجن پولیس اسٹیشن کے ایس ایچ او رئیس احمد اور ایس ڈی پی او سجاد ملک کی کوششوں سے مذکورہ شخص کی لاش دریا سے برآمد کی گئی اور بعد میں اسے قانونی چارہ جوئی کے لئے اسپتال منتقل کیا گیا۔
ایک پولیس عہدیدار نے اس واقعے کی تصدیق کرتے ہوئے ہلاک شدہ شخص کی شناخت غلام محمد دونٹو ولد عبدالرحمٰن دونٹو ساکن بنگر محلہ حاجن کے طور پر کی ہے۔
