پاکستان کے زیر انتظام کشمیر کی ایک خاتون شمالی کشمیر کے ضلع بانڈی پورہ کے حاجن اے بلاک سے ضلع ترقیاتی کونسل کا انتخاب لڑ رہی ہیں، ان کا کہنا ہے کہ وہ مقامی عوام کے مسائل و پریشانیوں کو حل کرنا چاہتی ہیں-
شازیہ اسلم نامی یہ خاتون پاکستان کے زیر انتظام کشمیر کے مظفرآباد سے تعلق رکھتی ہیں۔ پندرہ سال قبل ان کی شادی یہاں کے ایک سابق عسکریت پسند سے ہوئی تھی۔
ای ٹی بھارت کے ساتھ ایک خاص بات چیت کے دوران شازیہ نے کہا 'بانڈی پورہ کے حاجن علاقے کے غریب عوام کافی عرصے سے دکھوں میں مبتلا ہیں، کیونکہ عوام کو یہاں جن مسائل کا سامنا کرنا پڑ رہا ہے، انہیں عرصے سے حل نہیں کیا جاسکا ہے۔ ان مسائل نے مجھے مجبور کیا کہ میں ڈی ڈی سی انتخابات میں حصہ لوں'۔
شازیہ جمعرات کو حاجن کے مختلف علاقوں میں انتخابی مہم چلا رہی تھیں، اس دوران انہوں نے لوگوں کو ووٹ دینے کی اپیل کی اور لوگوں سے علاقے کی ترقی کے وعدے کیے۔
انہوں نے کہا 'میں پاکستان کے زیر انتظام کشمیر سے آئی ہوں، لیکن اب میرا یہیں ٹھکانہ ہے۔ میں اب یہیں کی ہوں اور میرا واحد مقصد ڈی ڈی سی انتخابات لڑنا اور بہتر سڑک، پانی و دیگر بنیادی سہولیات کے لئے کام کرنا ہے'۔
یہ بھی پڑھیے
اننت ناگ میں گرینیڈ حملہ، ایک سی آر پی ایف اہلکار زخمی
انہوں نے کہا 'مجھے خوشی ہے کہ مجھے انتخاب لڑنے اور غریب اور پسماندہ لوگوں کے لئے کام کرنے کا موقع دیا جا رہا ہے۔ اور میری خواہش ہے کہ ڈی ڈی سی انتخابات میں جیت درج کرنے کے بعد علاقے کے مسائل کو حل کروں اور یہاں ترقیاتی کاموں کو شروع کراؤں۔
