بانڈی پورہ: گریز میں والی بال ٹورنامنٹ اختتام پزیر

شمالی کشمیر کے ضلع بانڈی پورہ میں وادی گریز میں فوج کی داور بٹالین کی جانب سے ایک والی بال ٹورنامنٹ منعقد کیا گیا۔ جس میں نوجوانوں نے جوش و خروش کے ساتھ حصہ لیا۔

ضلع بانڈی پورہ کے سرحدی علاقہ گریز میں فوج کی جانب سے منعقد کیا گیا والی بال ٹورنامنٹ جمعرات کو اختتام پزیر ہوگیا۔

ٹورنامنٹ کے فائنل میچ میں مرکوٹ کی ٹیم نے وانپورہ کی ٹیم کے خلاف جیت درج کی۔ اختتامی تقریب کے دوران کھلاڑیوں میں انعامات بھی تقسیم کئے گئے۔

مقامی لوگوں نے فوج کی جانب سے کی گئی اس پہل کی ستائش کی گئی ہے اور انہوں نے امید ظاہر کی کہ آئندہ بھی اس طرح کے پروگرام منعقد کئے جائیں گے۔

لوگوں کا کہنا ہے کہ اس طرح کے مقابلوں سے نوجوان سماجی برائیوں سے دور رہتے ہیں اور ورزش کا بھی موقع ملتا ہے۔

دریں اثناء بی جے پی لیڈر و سابق رکن اسمبلی گریز فقیر محمد خان نے اختتامی تقریب میں مہمان خصوصی کے طور پر شرکت کی۔