ضلع بانڈی پورہ کے حاجن سومو اسٹینڈ سے وابستہ متعدد سومو ڈرائیوروں نے احتجاجی مظاہرہ کرتے ہوئے ضلع انتظامیہ سے گزشتہ سال کورونا وائرس کے دوران ان کی خدمات حاصل کرنے کے عوض طے شدہ رقم واگزار کیے جانے کا مطالبہ کیا۔
احتجاج کر رہے ڈرائیوروں نے بتایا کہ گزشتہ برس جب جموں و کشمیر میں کورونا وائرس تیزی سے پھیل رہا تھا، اُن پر آشوب ایام کے دوران ضلع انتظامیہ نے ان کی خدمات حاصل کیں، انکے مطابق انہوں نے انتظامیہ کو اپنی گاڑیاں کوویڈ ڈیوٹی کے لئے میسر رکھیں تاہم ابھی تک اس کے عوض انہیں رقم واگزار نہیں کی جا رہی ہے۔
انہوں نے کہا کہ انتظامیہ کی جانب سے رقم واگزار نہ کیے جانے کے سبب انہیں گوناگوں مالی مشکلات سے دوچار ہونا پڑ رہا ہے۔
مزید پڑھیں: بانڈی پورہ: منی سیکریٹریٹ کے بیشتر دفاتر مقفل یا ملازمین سے خالی
احتجاجی ڈرائیوروں نے بتایا کہ انہوں نے انتظامیہ سے کئی بار رقم واگزار کیے جانے کی درخواست کی تاہم انکے مطابق انتظامیہ اس جانب توجہ نہیں دے رہی۔ ڈرائیوروں نے مزید کہا کہ کئی بار گزارشات کو نظر انداز کیے جانے کے بعد وہ احتجاج کرنے پر مجبور ہو گئے۔
