شمالی کشمیر کے ضلع بانڈی پورہ کے ہاکبارہ علاقے میں تین سال قبل ایک بجلی رسیونگ اسٹیشن کی تعمیر کام شروع کیا گیا، تاہم تین سال کا عرصہ گزرنے کے باوجود تعمیری کام پایہ تکمیل کو نہیں پہنچا۔
مقامی لوگوں کا کہنا ہے کہ بجلی رسیونگ اسٹیشن پر ابتدائی ایام سے ہی کافی سست رفتاری سے کام انجام دیا جا رہا تھا وہیں انکے مطابق گزشتہ کئی مہینوں سے نامعلوم وجوہات کی بنا پر کام کو اچانک روک دیا گیا۔
قابل ذکر ہے کہ ہاکبارہ علاقے میں برسوں سے لوگوں کو بجلی کی کٹوتی کے مسائل کا سامنا کرنا پڑ رہا ہے خاص کر سردیوں کے موسم میں یہاں لوگوں کو بجلی کے حوالے شدید مشکلات سے کا سامنا رہتا ہے۔
مزید پڑھیں؛ بانڈی پورہ: خستہ حال رابطہ سڑک سے عوام کو دقتوں کا سامنا
مقامی لوگوں نے بتایا کہ تین سال قبل علاقے میں بجلی رسیونگ اسٹیشن پر کام شروع ہوتے ہی مقامی لوگوں کے چہرے کھل اٹھے تھے، انہیں امید تھی کہ شاید اب انہیں بجلی کے حوالے سے درپیش مسائل کا ازالہ ہوگا تاہم بجلی رسیونگ اسٹیشن کی تکمیل میں دیری کے سبب لوگ انتظامیہ سے نالاں ہیں۔
انہوں نے بجلی رسیونگ اسٹیشن کی تعمیر میں سرعت لائے جانے کا مطالبہ کیا تاکہ مقامی باشندوں کو بجلی کی کٹوتی سے درپیش مسائل کا ازالہ ہو سکے۔
