کشمیری شخص پنجاب میں لاپتہ، اہل خانہ کی حکومت سے مدد کی اپیل

شمالی کشمیر کے ضلع بانڈی پورہ کے حاجن علاقے سے تعلق رکھنے والا ایک شخص پنجاب کے شہر لدھیانہ میں مبینہ طور لاپتہ ہو گیا ہے۔ لاپتہ ہوئے شخص کے اہل خانہ نے حاجن، سوناواری کے پولیس تھانہ میں اس سلسلے میں گمشدگی کی رپورٹ درج کی ہے۔

پنجاب کے شہر لدھیانہ میں لاپتہ ہوئے کشمیری باشندے کے اہل خانہ نے سمبل، سوناواری میں خاموش مظاہرہ کرتے ہوئے حکومت سے مطالبہ کیا کہ گمشدہ شخص کی تلاش میں ان کی مدد کی جائے۔

میڈیا کے ساتھ بات کرتے ہوئے لاپتہ شخص کے اہل خانہ نے دعویٰ کیا کہ ’’وہ اپنی (غیر مقامی) زوجہ کے ہمراہ خوش دامن کی خبرگیری کے لیے ریاست بہار جا رہا تھا تاہم پنجاب کے شہر لدھیانہ میں قیام کے دوران لا پتہ ہو گیا۔‘‘

انہوں نے مزید کہا کہ ’’اسکی اہلیہ صحیح سلامت بہار پہنچ گئی اور تین روز بعد ہمیں لدھیانہ میں ہوئے واقعے کی اطلاع دی، جس کے بعد ہم نے پولیس اسٹیشن حاجن میں گمشدگی کی رپورـٹ درج کرائی۔‘‘

لاپتہ ہوئے شخص کی شناخت 35 سالہ گلزار احمد خان ساکنہ چندگیر، حاجن، سوناواری کے طور پر ہوئی ہے جس کی شادی ریاست بہار کی ایک لڑکی سے ہوئی ہے۔

گلزار احمد کے اہل خانہ نے انتظامیہ سے مدد کی اپیل کرتے ہوئے گلزار احمد کا پتہ لگانے میں انکی مدد کرنے کی گزارش کی ہے۔