آسام میں سیلاب کی وجہ سے ہلاکتوں کی تعداد 110 ہوگئی ہے۔ آسام کے وزیر اعلی سربانند سونووال نے کہا کہ 'سیلاب کی وجہ سے 70 لاکھ سے زیادہ افراد متاثر ہوئے ہیں۔ متاثرہ علاقوں سے لوگوں اور جانوروں کو بچایا جارہا ہے۔ انہوں نے کہا کہ 'سبھی کو امدادی کیمپوں اور محفوظ مقامات پر منتقل کیا جارہا ہے'۔
ریاست میں سیلاب کی وجہ سے 24 اضلاع ڈوب چکے ہیں۔ ریاست کے بہت سے اضلاع میں نیشنل ڈیزاسٹر رسپانس فورس اور آسام اسٹیٹ ڈیزاسٹر رسپانس فورس کے اہلکار ریسکیو آپریشن کر رہے ہیں۔ اس دوران مقامی لوگوں کو امدادی اشیا بھی تقسیم کی جارہی ہے۔
یہ بھی پڑھیں: آسام میں سیلاب کا قہر جاری، 27 اضلاع متاثر
اطلاعات کے مطابق، تقریباً 3376 گاؤں سیلاب سے متاثر ہوئے ہیں۔ دھیماجی، لکھیم پور، بسواناتھ، سونت پور، درانگ، بکسہ، نلباڑی، بارپیٹا، چیرانگ، بونگائی گاؤں، تنسوکیہ کے اضلاع بنیادی طور پر سیلاب کا شکار ہیں۔ وہیں قاضی رنگا نیشنل پارک کا 80 فیصد حصہ بھی سیلاب میں ڈوبا ہوا ہے، جس میں 100 سے زیادہ جانور ہلاک ہوگئے ہیں۔
