گوہاٹی: آسام حکومت نے ریاست کے 31 اضلاع میں کم از کم 1281 مدارس کے نام بدل کر انہیں عام اسکولوں میں تبدیل کردیا ہے۔ حکام نے جمعرات کو یہ اطلاع دی۔ ریاستی وزیر تعلیم رنوج پیگو نے اپنے ایکس ہینڈل پر معلومات شیئر کیں۔
انہوں نے لکھا، "بورڈ آف سیکنڈری ایجوکیشن، آسام (ایس ای بی اے) کے تحت تمام سرکاری اور صوبائی مدارس کو عام اسکولوں میں تبدیل کرنے کے نتیجے میں، محکمہ اسکولی تعلیم، آسام نے آج ایک نوٹیفکیشن کے ذریعے 1281 ایم ای مدارس کے نام بدل کر مڈل کر دیے ہیں۔ان مدرسوں کو مڈل انگلش اسکول کر دیا گیا ہے۔
پیگو کے ذریعہ شیئر کردہ آرڈر میں کہا گیا ہے، "ریاستی حکومت کی منظوری کے مطابق، ڈائریکٹوریٹ آف ایلیمنٹری ایجوکیشن، آسام کے تحت 1281 اپر پرائمری اسکولوں کا نام فوری اثر سے ایم ای اسکول رکھ دیا جائے گا۔"
جنوری 2021 میں، آسام حکومت کی طرف سے ایک قانون منظور کیا گیا، جس سے ریاست کے تمام سرکاری مدارس کو عام اسکول بننے کی راہ ہموار ہوئی۔ نجی مدارس کو چھوڑ کر، اس نے 731 مدارس اور عربی کالجوں کو متاثر کیا جو ریاستی مدرسہ تعلیمی بورڈ، آسام ہائر سیکنڈری ایجوکیشن کونسل اور سیکنڈری ایجوکیشن بورڈ، آسام (ایس ای بی اے) کا حصہ تھے۔
اس سال مارچ میں کرناٹک میں ایک ریلی میں آسام کے وزیر اعلیٰ ہمانتا بسوا سرما نے اعلان کیا کہ ان کی حکومت نے 600 مدارس کو بند کر دیا ہے اور وہ تمام مدارس کو بند کرنے کا ارادہ رکھتی ہے کیونکہ ہم اسلامی مذہبی مراکز کے بجائے تعلیمی ادارے کو اہمیت دیتے ہیں۔
