گوہاٹی: نیشنل انویسٹی گیشن ایجنسی (این آئی اے) نے آسام کے گولپارہ اور بونگائیگاؤں ضلع سے چار مشتبہ افراد کو دوبارہ گرفتار کیا جنہیں عدالت نے کچھ دن پہلے ضمانت دی تھی۔ گرفتار افراد کی شناخت عبدالسبحان، جلال الدین، عبدالسبحان اور حفیظ الرحمن کے نام سے ہوئی ہے۔ گولپارہ ضلع کے پولیس سپرنٹنڈنٹ وی وی راکیش ریڈی نے فون پر اے این آئی کو بتایا کہ این آئی اے نے جمعہ کی رات گولپارہ ضلع کے مختلف حصوں سے تین افراد کو گرفتار کیا جنہیں عدالت نے کچھ دن پہلے ضمانت دی تھی۔
وی وی راکیش ریڈی نے کہا کہ اس سے قبل عبدالسبحان، جلال الدین اور عبدالسبحان کو ملک مخالف سرگرمیوں میں ملوث ہونے کے الزام میں گرفتار کیا گیا تھا اور چند روز قبل انہیں عدالت نے ضمانت دے دی تھی۔ انہیں مٹیا پولیس اسٹیشن، مورنوئی پولیس اسٹیشن اور گولپارہ پولیس اسٹیشن کے تحت آنے والے علاقوں سے دوبارہ گرفتار کیا گیا تھا۔
- مزید پڑھیں:۔ Three Suspected Detained in Ahmedabad احمدآباد میں تین مشتبہ افراد کو حراست میں لیا گیا
دوسری طرف این آئی اے نے ایک اور شخص حفیظ الرحمن کو بونگائیگاؤں ضلع کے جوگیگھوپا علاقے سے دوبارہ گرفتار کیا۔ بونگائیگاؤں ضلع کے پولیس سپرنٹنڈنٹ سوپنیل ڈیکا نے کہا کہ پہلے حفیظ الرحمن کو ضمانت دی گئی تھی اور این آئی اے نے جمعہ کی رات این آئی اے کیس کے سلسلے میں انہیں دوبارہ گرفتار کیا تھا۔ اس سے قبل این آئی اے نے اے کیو آئی ایس اور انصار اللہ بنگلہ ٹیم (اے بی ٹی) کے سلسلے میں این آئی اے گوہاٹی میں دو کیس درج کیے تھے۔
