آندھرپردیش حکومت کی جانب سے اس واقعہ کی پانچ رکنی ٹیم تشکیل دیئے جانے کے دوسرے دن سابق وزیراعلیٰ چندرابابو نائیڈو نے وزیراعظم نریندر مودی سے اس معاملہ کی سائنس ماہرین کے ذریعہ تحقیقات کرانے کا مطالبہ کیا۔
چندرابابو نائیڈو نے وزیراعظم کو لکھے خط میں مرکزکے رول کی ستائش کی اور کہا کہ پلانٹ سے گیس کے اخراج کوکنٹرول میں کرنے کےلیے مرکزی حکومت نے فوری ردعمل کا اظہار کیا ہے۔
انہوں نے وزیراعظم سے مطالبہ کیا کہ گیس اخراج واقعہ کی تحقیقات کےلیے سائنسی ماہرین کی ایک کمیٹی تشکیل دی جائے اور معاملہ کی مکمل تفتیش کی جائے۔
سابق وزیراعلیٰ نے کہا کہ کمپنی نے صرف اسٹرین گیس کے اخراج کا دعویٰ کیا ہے جبکہ اس تعلق سے متضاد اطلاعات موصول ہو رہی ہیں۔
انہوں نے کہا کہ زیرعلاج افراد کی صحت پر اس کے دیرپا اثرات مرتب ہونے کا شبہ ظاہر کیا جارہا ہے جو تشویشناک بات ہے۔
تلگودیشم سربراہ نے کہا کہ اس بات کا جائزہ لینا ضروری ہوگا کہ آیا گیس کے اثرات مستقبل میں تو ظاہر نہیں ہوں گے۔ انہوں نے وزیراعلیٰ وائی ایس جگن موہن ریڈی پر الزام عائد کیاکہ وہ گیس اخراج واقعہ کی سنگینی کو نہیں سمجھ رہے ہیں۔
انہوں نے مزید الزام لگاتے ہوئے کہا کہ جگن موہن ریڈی کو کوئی معلومات نہیں ہے اوروہ دوسروں کے مشورے قبول نہیں کرتے۔
