آندھراپردیش میں آئندہ دو نومبر سے اسکول پھر سے کھلیں گے اور متبادل دن کی بنیاد پر کلاسز چلیں گی۔ ایک سرکاری بیان میں یہ اطلاع دی گئی۔
وزیراعلی وائی ایس جگن موہن ریڈی نے منگل کو ایک میٹنگ کا جائزہ لیتے ہوئے کہا کہ آئندہ دو نومبر سے ریاست میں اسکولز کو پھر سے کھولنے کا فیصلہ کیا گیا ہے۔
پہلے دن پہلی، تیسری، پانچویں اور ساتویں جماعت کے طلبا کی کلاسز چلیں گی اور دوسری، چوتھی، چھٹی اور آٹھویں جماعت کے طلبا کے لئے کلاسیں دیگر دنوں میں منعقد کی جائیں گی تاکہ طلبا کو کورونا وائرس سے متاثر ہونے سے بچایا جاسکے۔
وزیراعلی نے کہا کہ اگرکسی اسکول میں ان کلاسوں کی طلبا کی تعداد 750سے زیادہ ہے تو کلاسیں ہر تین دن میں ایک بار لگیں گی۔ اس کے علاوہ ریاست کے بیشتر اسکول دوپہر تک کھلیں گے۔ طلبا کو مڈ ڈے میل تقسیم کرنے کے بعد انہیں گھر بھیج دیا جائے گا۔
انہوں نے کہا کہ نومبر کے دوران صورتحال کو جاننے کے بعد ڈسمبر میں کلاسز کیسے منعقد کی جائیں اس پر فیصلہ کیا جائے گا۔ وزیراعلی نے متعلقہ حکام سے کہا کہ اگرطلبا کے والدین اپنے بچوں کواسکول بھیجنے پر متفق نہیں ہیں تو وہ اپنے بچوں کو آن لائن تعلیم دیں۔
