آندھراپردیش: کمسن لڑکے کو گیند لگنے سے جان بحق

آندھراپردیش میں کرکٹ کی گیند سینہ پر لگنے سے کمسن لڑکا جان بحق ہوگیا۔ یہ افسوسناک واقعہ جمعہ کی شام کرنول ضلع کے ادونی میں پیش آیا۔

پولیس کے مطابق ادونی ٹاون کے کاروان ہیٹ سے تعلق رکھنے والے خواجہ کا دوسرا لڑکا دس سالہ معین اپنے دوستوں کے ساتھ جامع مسجد گراونڈ میں کرکٹ کھیل رہا تھا۔

بتایا گیا ہے کہ معین گیند بازی کررہا تھا کہ بلے بازی کرنے والے ایک لڑکے نے گیند کو زور سے مارا اور گیند معین کے سینے سے ٹکرا گئی جس کے فوری بعد معین موقع پر ہی گر پڑا۔

ساتھیوں نے اسے علاج کے لئے ادونی اسپتال منتقل کیا۔ ڈاکٹروں نے طبی معائنہ کے بعد ان کی موت کی تصدیق کردی۔