سیلفی لینے کی کوشش کے دوران ریاست آندھرا پردیش سے تعلق رکھنے والی خاتون امریکہ کے ایک آبشار میں گرکر ہلاک ہوگئی۔
اس 27 سالہ خاتون کی شناخت آندھرا پردیش کے ضلع کرشنا کی رہنے والی کملا کے طور پر کی گئی ہے۔ وہ امریکہ میں سافٹ ویر کمپنی میں کام کرتی تھی۔
پولیس نے کہا کہ وہ اوہائیو کے مے فیلڈہائیٹس علاقہ میں مقیم تھی۔ ہفتہ کو وہ اپنے رشتہ داروں کے مکان گئی تھی۔ واپسی کے دوران وہ بالڈ دریا کے آبشار کے قریب سیلفی لینے کے لیے رکی، تاہم اتفاقی طور پر وہ پانی میں گر گئی جس کے نتیجہ میں اس کی موت ہوگئی۔
اس کے منگیتر نے کہا کہ وہ آبشار کے قریب ٹہرے ہوئے تھے کہ اچانک وہ اس آبشار میں گر پڑی۔ کملا کو آبشار سے نکال کر ہسپتال منتقل کیا گیا جہاں ڈاکٹرز نے اس کو مردہ قرار دیا۔
مقامی اطلاعات کے مطابق کملا ضلع کرشنا کے گُڈلا والیرو گاؤں کی رہنے والی تھی۔ وہ ایم ایس کی تعلیم کے لیے امریکہ گئی تھی۔
بعد ازاں اس نے وہاں ایک کمپنی میں ملازمت اختیار کی۔ نارتھ امریکن تلگو سوسائٹی کی جانب سے اس کی لاش کو بھارت واپس بھیجنے کے انتظامات کیے جارہے ہیں تاکہ اس کے آبائی گاؤں میں اس کی آخری رسومات انجام دی جاسکے۔
