Wild Animals in Kokernag کوکرناگ کے سنبراری بالا کے رہائشی علاقوں میں جنگلی جانوروں کا خوف

اننت ناگ کے حلقہ انتخاب کوکرناگ کے سنبراری بالا میں جنگلی جانوروں کے نمودار ہونے سے مقامی لوگوں میں خوف دہشت کا ماحول ہے۔ مقامی افراد کا کہنا ہے کہ جنگلی جانوروں کے ڈر سے علاقے کے رہائشی دن بھر اپنے گھروں کے اندر ہی سہم کر رہ جاتے ہیں۔Wild Animals in Kokernag

کوکرناگ: جموں و کشمیر کے جنوبی ضلع اننت ناگ کے حلقہ انتخاب کوکرناگ کے سنبراری بالا میں جنگلی جانوروں کے نمودار ہونے سے مقامی لوگوں میں خوف و دہشت کا ماحول ہے۔ مقامی لوگوں نے شکایت کی ہے کہ مذکورہ علاقے میں مکی کی فصل تیار ہو چکی ہے، جس کے نتیجے میں جنگلی جانور کھانے کی تلاش میں مذکورہ بستی کا رُخ کر رہے ہیں، انہوں نے کہا کہ جنگلی جانوروں کے ڈر سے علاقے کے رہائشی دن بھر اپنے گھروں کے اندر ہی سہم کر رہ جاتے ہیں، وہیں جنگلی جانوروں کے ڈر سے علاقے کے اسکولی بچے بھی اسکول جانے سے گریز کرتے ہیں۔Wild Animals in Kokernag

مقامی لوگوں کا کہنا ہے کہ گزشتہ سال مذکورہ علاقے میں جنگلی جانوروں نے ان کی فصل کو کافی نقصان پہنچایا تھا اور علاقے کے کئی افراد کو لہو لہان بھی کر دیا تھا، انہوں نے کہا کہ ہم اپنے بچوں کو باہر نہیں جانے دیتے ہیں کیونکہ مقامی لوگوں میں کافی خوف ہراس پھیل گیا ہے، جس کے باعث بچے اپنے ہی گھروں میں سہم کر رہ جاتے ہیں۔

انہوں نے کہا کہ ہم نے یہ معاملہ کئی بار محکمہ وائلڈ لائف کی نوٹس میں لایا تھا حالانکہ گزشتہ برس محکمہ نے جنگلی جانوروں کو پکڑنے کی غرض سے علاقے میں کئی بار سرچ آپریشن جاری کیا تھا تاہم متعلقہ محکمہ کو کبھی بھی کامیابی حاصل نہیں ہوسکی، جب کہ رواں برس محکمہ وائلڈ لائف علاقے میں آئے بھی نہیں ہیں۔ مقامی لوگوں نے ضلع انتظامیہ سے مطالبہ کیا ہے کہ وہ متعلقہ محکمہ کو احکامات صادر کریں تاکہ علاقے میں لوگوں کے جان ومال کے تحفظ کو یقینی بنایا جا سکے۔