جموں و کشمیر کے ضلع اننت ناگ کے حلقہ انتخاب بجبہاڈہ میں واقع ہٹمورہ علاقے میں گرو گوبند سنگھ کے پیدائش کے موقعے پر مقامی سکھوں نے دہلی میں احتجاج کر رہے کسانوں کی حمایت کا اظہار کیا۔ مقامی لوگوں نے اس موقع پر حکومت سے مطالبہ کیا کہ' نئے زرعی قوانین کے خلاف دھرنے پر بیٹھے کسانوں کے مطالبات جلد از جلد تسلیم کیے جائیں۔
اُنہوں نے کہا کہ' ہم سب بھارتی ہیں، اس کے باوجود بھی ہمیں بہت غلط نظر سے دیکھا جا رہا ہے۔ ہمارے لئے شدت پسند اور دہشت گرد جیسے الفاظ استعمال کئے جاتے ہیں'۔
اُنہوں نے کہا کہ' اب تک جاری دھرنے کے دوران ہمارے کئی کسان بھائیوں نے اپنی جانیں گنوائی ہیں۔ اُنہوں نے حکومت سے اپیل کی کہ' وہ زرعی قوانین کو فوری اور مکمل طور پر واپس لے تاکہ احتجاجی کسان اپنے گھروں کو واپس لوٹ جائیں'۔
مزید پڑھیں: بڈگام: بمنہ علاقہ میں پٹواری نہ ہونے سے لوگ مسائل سے دوچار
واضح رہے کہ' کسان اور حکومت کے مابین بات چیت کا سلسلہ جاری ہے، لیکن کسان نئے زرعی قوانین کی واپسی کے مطالبے سے پیچھے ہٹنے کو تیار نہیں ہیں۔
