تفصیلات کے مطابق ماگام کوکرناگ ہائی سکول کے طلبا، اساتذہ کے تبادلے (ٹرانسفر) کے خلاف احتجاج کر رہے تھے۔
طلبا نے کوکرناگ سنتھن ٹاپ شاہراہ پر احتجاجی دھرنا دیا اور اساتذہ کے تبادلے کو منسوخ کرنے اور انہیں دوبارہ مذکورہ اسکول میں تعینات کرنے کی مانگ کر رہے تھے۔
طلبا کے مطابق پولیس نے مبینہ طور ان پر لاٹھی چارج کیا، جس دوران کئی طلبا کو چوٹیں آئی ہیں۔
زخمیوں کو سب ضلع ہسپتال کوکرناگ میں داخل کیا گیا ہے جبکہ ایک طالبہ کو ضلع ہسپتال اننت ناگ میں بھرتی کیا گیا ہے۔
زخمی طالبہ نے ای ٹی وی بھارت سے بات کرتے ہوئے کہا کہ وہ اپنی مانگ کو لے کر پر امن طریقہ سے احتجاج کر رہے تھے، اس کے باوجود پولیس نے ان پر لاٹھی چارج کیا جو سراسر ناانصافی ہے۔
زخمی طلبا کے والد نے کہا کہ پولیس نے معصوم بچوں کے ساتھ مارپیٹ کر کے قانون کو ہاتھ میں لیا ہے۔
انہوں نے انتظامیہ سے معاملہ کی جانچ اور ملوث پولیس اہلکاروں کے خلاف کارروائی کا مطالبہ کیا۔
