اننت ناگ: جنوبی کشمیر کے اننت ناگ ضلع کے میربازار کے زڈورہ گاؤں میں تقریبا ایک سو خانہ بدوش خاندان سیلاب کی وجہ سے پھنس گئے تھے۔ خانہ بدوش خاندانوں کو مویشیوں سمیت بچا لیا گیا ہے۔ پولیس نے سو خانہ بدوش خاندانوں کو ان کے مال مویشیوں کے ساتھ بچا لیا۔ ہفتہ کی دوپہر یہ سبھی اننت ناگ ضلع میں میربازار کے زڈورہ گاؤں میں پھنس گئے تھے۔ دراصل پولیس کو اطلاع ملی کہ گزشتہ رات مسلسل بارش کے بعد پانی کی سطح میں اچانک اضافہ ہونے کی وجہ سے کچھ خانہ بدوش اپنے مویشیوں کے ساتھ زڈورہ گاؤں میربازار میں پھنس گئے ہیں۔
پولیس پوسٹ میر بازار سے پولیس پارٹی نے فوری کارروائی کرتے ہوئے ریونیو اور ایس ڈی آر ایف ٹیموں کے اشتراک سے فوری طور پر مذکورہ علاقے میں ریسکیو آپریشن شروع کیا۔ ریسکیو آپریشن کے دوران ایک سو خانہ بدوش خاندانوں کو ان کے مویشیوں اور ضروری اشیاء سمیت بچا لیا گیا۔ بچاؤ کارروائی کے بعد خانہ بدوشوں کو بالترتیب مڈل اسکول فُرہ، بُمتھن اور زڈورہ منتقل کر دیا گیا ہے۔ مقامی لوگوں خاص طور پر خانہ بدوشوں نے پولیس کی بروقت مدد اور ان کے جان و مال کے تحفظ کو یقینی بنانے پر ان کا شکریہ ادا کیا۔
واضح رہے کہ گزشتہ کئی روز سے وادی کے پہاڑی علاقوں سمیت میدانی علاقوں میں موسلا دھار بارش کے سبب دریا، ندی اور نالوں میں پانی کی سطح میں اضافہ ہوا ہے۔ وہیں نشیبی علاقوں میں پانی جمع ہو گیا ہے، جس کی وجہ سے عام زندگی متاثر ہو گئی ہے۔
