لارنو میں پی ڈی پی کا اجلاس

پارٹی کے رہنماؤں نے ورکرز پر زور دیا کہ وہ آنے والے ڈی ڈی سی انتخابات میں بڑھ چڑھ کر حصہ لیں اور گپکار ڈکلریشن کی جانب سے منتخب کئے گئے امیدوار کو بھاری اکثریت سے کامیاب کریں۔

جموں و کشمیر کے ضلع اننت ناگ کے لارنو نامی علاقہ میں آج پی ڈی پی کی جانب سے اجلاس منعقد ہوا، جس کی صدارت پارٹی کے سینئر رہنما عبدل السلام ریشی نے کی۔ ان کے ہمراہ پارٹی کے سینئر رہنما گلزار احمد کھٹانہ اور ڈی ڈی سی انتخابات میں حصہ لینے والی ان کی اہلیہ خالدہ بی بی بھی موجود تھیں۔ جبکہ اجلاس میں علاقہ سے تعلق رکھنے والے کئی لوگوں نے شرکت کی۔

اس موقع پر پارٹی کے رہنماؤں نے ورکران پر زور دیا کہ وہ آنے والے ڈی ڈی سی انتخابات میں بڑھ چڑھ کر حصہ لیں اور گپکار ڈکلریشن کی جانب سے منتخب کئے گئے امیدوار کو بھاری اکثریت سے کامیاب کریں۔اس موقع پر پارٹی کے سینئر رہنما عبدل السلام ریشی نے ای ٹی وی بھارت سے بات کرتے ہوئے کہا کہ 'لارنو بلاک کافی پسماندہ ہے، ہماری کوشش رہے گی کہ یہاں کے نوجوانوں کے لئے روزگار کے نئے مواقع فراہم کریں۔ انہوں نے کہا کہ ہم پوری کوشش کریں گے کہ لوگوں کی امیدوں پر کھرا اتریں۔'بی جے پی کے ریاستی صدر رویندر رینہ کے بیان پر سینئر رہنما عبدل السلام ریشی کا کہنا تھا کہ رینہ کو ایسی باتوں سے گریز کرنا چاہئے۔

انہوں نے کہا کہ بی جے پی پہلے سے ہی لوگوں میں انتشار پھیلا رہی ہے اور ایسی بیان بازی سے عوامی جزبات کو ٹھیس پہنچتی ہے۔