جنوبی ضلع اننت ناگ میں محکمہ جنگلات نے فاریسٹ پروٹیکشن فورس کے ساتھ مشترکہ کاروائی کرتے ہوئے کوکرناگ رینج کے صوف شالی علاقہ میں غیر قانونی لکڑی کو ضبط کیا ہے
تفصیلات کے مطابق ڈویژنل فاریسٹ افسر اننت ناگ فیروز احمد چاکٹ کو مصدقہ اطلاع موصول ہوئی تھی کہ کوکرناگ کے صوف علاقہ کے کمپاٹمینٹ نمبر 120 میں بنائے گئے کوٹھوں میں جنگلوں سے کاٹی گئی عمارتی لکڑی پوشیدہ طور پر رکھی گئی ہے۔
مخبر کی اطلاع کے بعد انہوں نے فاریسٹ کنٹرول روم اننت ناگ اور مقامی عملہ کو مذکورہ مقام کی جانب روانہ ہونے کے لیے خصوصی طور پر احکامات صادر کیے۔
ذرائع کے مطابق جیسے ہی اہلکاروں نے محمد شفیع اور اشرف کے دو کوٹھوں پر چھایہ مارنے کا عمل شروع کیا تو وہاں سے تقریبا 95 مکعب فٹ چیرائی شدہ عمارتی لکڑی برآمد کی گئی، جسے موقع پر ہی ضبط کرکے، محکمہ جنگلات کے اہلکاروں نے ملزمین کے خلاف کاروائی شروع کردی ہے۔
اس واقعے کی تصدیق کرتے ہوئے ڈی ایف او اننت ناگ کا کہنا ہے کہ اسمگلروں پر سیفٹی ایکٹ نافذ کرنے کے لیے بھی اقدامات اٹھائے جا رہے ہیں، انھوں نے مزید کہا کہ جنگلات کو تحفظ فراہم کرنا ان کی اولین ترجیحات میں شامل ہیں، علاوہ ازیں ذرائع کے مطابق لکڑی ضبط کرنے کی اس کاروائی میں فاریسٹ پروٹیکش فورس کے اہلکار بھی شامل تھے۔
