پولیس ذرائع کے مطابق عسکریت پسندوں نے اننت ناگ کے مصروف علاقہ لال چوک میں ڈی سی آفس کے نزدیک گرینیڈ پھینکا۔اس میں 14 افراد زخمی ہوئے جن میں ایک ٹریفک پولیس اہلکار اور ایک صحافی بھی شامل ہے'۔
ضلع پولیس اننت ناگ کے ایک ترجمان نے بتایا کہ ایک زخمی کو چھوڑ کر دیگر سبھی زخمیوں کو ضلع ہسپتال اننت ناگ سے فارغ کیا گیا ہے۔ ایک زخمی جس کے سینے میں آہنی ریزے لگے ہیں، کی حالت نازک بتائی جارہی ہے'۔
سیکورٹی ذرائع نے بتایا کہ گرینیڈ حملے کے فوراً بعد سیکورٹی فورسز نے علاقے کو محاصرے میں لیکر تلاشی آپریشن چلایا تاہم حملہ آور فرار ہونے میں کامیاب ہوگئے۔ انہوں نے مزید کہا کہ حملہ آوروں کو ڈھونڈ نکالنے کے لیے علاقہ میں چیکنک پوائنٹس کو متحرک کیا گیا ہے۔
بتا دیں کہ جموں و کشمیر کی خصوصی حیثیت کے خاتمے کے بعد عسکریت پسندوں کی جانب سے یہ دوسرا حملہ ہے۔
گزشتہ ماہ کی 28 تاریخ کو سرینگر کے ڈاؤن ٹاؤن میں عسکریت پسندوں نے سی آر پی ایف اہلکاروں پر گرئینڈ داغا تھا، تاہم اس حملے میں کسی کے ہلاک یا زخمی نہیں ہوا تھا۔
ڈاون ٹاؤن کے نواکدل علاقے میں تعنیات سی آر پی ایف کے 38 ویں بٹالین پر یہ گرئینڈ پھینکا گیا ہے، جب یہ اپنی ڈیوٹی انجام دے رہے تھے۔
ادھر اسی روز ضلع کشتواڑ میں سکیورٹی فورسز نے ایک تصادم کے دوران تین عسکریت پسندوں کو مار گرایا تھا۔ تصادم میں ایک فوجی جوان بھی زخمی ہو گیا تھا۔
