جنوبی کشمیر کے ضلع اننت ناگ میں کوکرناگ علاقے سے تعلق رکھنے والے کسان کھیتوں اور باغات کو سیراب کرنے سے قاصر ہیں کیونکہ ان کے مطابق محکمہ آبپاشی سینچائی کے لیے ان کے علاقوں کو پانی فراہم کرنے میں ناکام ہو چکا ہے۔ ان علاقوں میں دمحال اور ہلر گاوں قابل ذکر ہے۔
مقامی کسانوں نے ای ٹی وی بھارت کے ساتھ بات کرتے ہوئے کہا کہ علاقے میں پانی کی قلت نہیں ہیں، ’’یہاں کے ندی نالوں میں پانی موجود ہے لیکن اُسے کھیتوں تک پہنچانے میں محکمہ آپاشی کے ملازمین بری طرح سے ناکام ہو چکے ہیں۔‘‘
کسانوں کے مطابق بعض اوقات وہ ندی نالوں کا پانی اپنے کھیتوں کی اور موڑنے کے لیے مجبور ہو جاتے ہیں جس کی وجہ سے بعض اوقات تنازعات بپا ہوتے رہتے ہیں۔
ای ٹی وی بھارت کے ساتھ بات کرتے ہوئے کسانوں کا کہنا تھا کہ اب تک شالی کی پنیری کا کام اختتام ہوا ہوتا، لیکن پانی کی عدم دستیابی کی وجہ سے انہیں مشکلات کا سامنا کرنا پڑ رہا ہے۔
کسانوں نے مزید کہا کہ اس ضمن میں انہوں نے کئی بار متعلقہ محکمہ کی توجہ اس جانب مبذول کرانے کی کوشش کی تاہم ابھی تک ان کے مسائل کا ازالہ نہیں ہو سکا جس کی وجہ سے کسانوں کی زمین ابھی تک سوکھی پڑی ہے۔
