کووڈ 19 کے تناظر میں بیداری پروگرام کا انعقاد

عالمی وبا کورونا وائرس سے محفوظ رہنے، احتیاطی تدابیر کو اپنانے اور دوسروں کو بھی اس جانب ترغیب دینے کی غرض سے ضلع اننت ناگ میں ایک بیداری پروگرام کا اہتمام کیا گیا۔

ایڈس کنٹرول سوسائٹی اور دارالعلوم سلفیہ فاؤنڈیشن کے اشتراک سے ضلع اننت ناگ کے آنچی ڈورہ میں کورونا وائرس کے تناظر میں ایک بیداری پروگرام کا اہتمام کیا گیا۔

اس موقعہ پر دارالعلوم سے منسلک طلبہ و علماء کو کورونا وائرس کے بارے میں معلومات فراہم کی گئی۔ پروگرام کے دوران شرکاء کو، کووڈ19 کے بچاؤ اور احتیاطی تدابیر اپنانے پر زور دیا گیا تاکہ کورونا وائرس کے پھیلاؤ کو روکا جا سکے۔

اس موقع پر طلباء و دارلعلوم سے وابستہ اساتذہ میں ماسکس اور سینیٹائزرس مفت تقسیم کیے گئے۔

سلفیہ فاؤنڈیشن کے بانی مولانا محمد مقبول آکھرنی نے محکمہ صحت کی اس پہل کا شکریہ ادا کیا، انہوں نے لوگوں سے اپیل کرتے ہوئے کہا کہ وہ کورونا وائرس کے خلاف لڑائی میں محکمہ صحت کو اپنا بھرپور تعاون فراہم کریں۔