سماج کو منشیات کی لعنت سے پاک کرنے کے لئے اننت ناگ پولیس کی جانب سے گزشتہ ایک ماہ کے دوران منشیات مخالف مہم میں کافی تیزی لائی گئی۔ حال ہی میں امتیاز حسین کا بطور ایس ایس پی اننت ناگ کا عہدہ سنبھالنے کے بعد ڈرگ مافیہ کی نیندیں حرام ہو گئی ہیں۔
ایس ایس پی اننت ناگ امتیاز حسین کی سربراہی میں گزشتہ ایک ماہ کے دوران بھاری مقدار میں منشیات ضبط کی گئی۔ جبکہ اس میں ملوث متعدد افراد کو گرفتار کیا گیا ہے۔
اننت ناگ پولیس کی جانب سے فراہم کی گئی تفصیلات کے مطابق اپریل کے مہینہ میں این ڈی پی ایس ایکٹ کے تحت 35 کیسز درج کئے گئے ہیں جبکہ اس میں ملوث 40 افراد کو گرفتار کیا گیا ہے۔
رواں ماہ کے دوران 40 کلو تین سو پچہتر گرام چرس، 52 کلو گرام فُکی، 19 کلو بھنگ پوڈر، 22 کلو گرام پوشتہ کا چھلکا، 5217 نشیلی ادویات کی گولیاں، 2285 کوڈین بوتلیں، براؤن شُگر، ہیروئن 10۰23 گرام ضبط کیا گیا ہے۔
عوامی حلقوں کی جانب سے منشیات مخالف پولیس کی اس بہتر کارکردگی کی تعریف کی جا رہی ہے۔ وہیں پولیس کی طرف سے عوام سے اپیل کی جارہی ہے کہ وہ اس مہم میں انہیں اپنا تعاون فراہم کریں تاکہ سماج سے منشیات کی برائی کا خاتمہ کیا جا سکے۔
