ضلع اننت ناگ کے بنتورو علاقے میں گرلز ہاسٹل کا کام مکمل ہونے کے بعد جمعرات کو اننت ناگ کے ترقیاتی کمشنر ڈاکٹر پیوش سنگلا اور نو منتخب ڈی ڈی سی ممبر، اچھہ بل، سمینہ حسین نے افتتاح کیا۔
ہاسٹل کی تعمیر محکمہ تعمیرات عامہ نے تقریباََ 2 کروڑ 70 لاکھ کی لاگت سے مکمل کی۔
واضح رہے کہ مرکزی حکومت نے حال ہی میں جموں و کشمیر میں 44 ہاسٹل تعمیر کرنے کا اعلان کیا تھا تاکہ طلبہ کو حصول تعلیم کے دوران رہائشی سہولیات فراہم کی جا سکیں۔
بنتورو میں گرلز ہاسٹل کے افتتاح کے موقع پر ڈی ڈی سی ممبر نے کہا کہ ’’جموں و کشمیر میں تعمیر و ترقی کا دور شروع ہو چکا ہے اور آنے والے دنوں میں اچھہ بل علاقے میں رکے پڑے تعمیراتی کاموں کو وقت پر مکمل کرنے کی کوشش کی جائے گی۔‘‘
مزید پڑھیں: پہلگام: سیاحوں کی آمد سے وادیٔ کشمیر میں رونق بحال
انہوں نے کہا کہ طالبات کے لیے گرلز ہاسٹل نہ ہونے کے سبب کئی لڑکیوں کی تعلیم مکمل نہیں ہو پاتی تھی، تاہم علاقے میں ہاسٹل کے قیام سے خواتین کی تعلیم متاثر نہیں ہوگی۔
ڈی سی اننت ناگ نے کہا کہ ضلع میں تعمیر وترقی کے حوالے سے جتنے بھی کام چل رہیں ہیں انہیں جلد سے جلد مکمل کرکے عوام کے لیے وقف کرنے کی پوری کوشش کی جائے گی۔
