ملک بھر کے ساتھ ساتھ وادی کشمیر میں بھی کورونا مریضوں کی تعداد میں اضافہ ہوتا جا رہا ہے۔ تاہم سیاحتی مقامات پر غیر مقامی سیاحوں کی آمد میں بھی اضافہ دیکھنے کو مل رہا ہے۔ وہیں حکام کی جانب سے جنوبی کشمیر کے مشہور سیاحتی مقام پہلگام میں سیاحوں کی کورونا ٹیسٹنگ کے لئے ایک ٹیم تعینات کی گئی ہے جو آنے والے سیاحوں کے نمونے لے رہی ہے۔
یہ ٹیم نونہ ون، پہلگام میں موجود سیاحوں کا آر ٹی، پی سی آر ٹیسٹ کر رہی ہے جس کا تنیجہ دو دن بعد ظاہر کیا جا رہا ہے۔ تاہم ٹیسٹنگ پر تعینات عملہ نے ریپڈ ٹیسٹنگ (RAT) کا مطالبہ کیا ہے تاکہ بر وقت سیاح کے مثبت یا منفی ہونے کی رپورٹ معلوم ہو سکے۔
ای ٹی وی بھارت سے بات کرتے ہوئے محکمہ صحت کے ایک عہدیدار نے بتایا کہ ’’ہم سیاحوں کی کورونا تشخیص کر رہے ہیں تاکہ یہ خوبصورت مقام وبائی مرض سے دور رہے۔‘‘
وہیں انہوں نے مزید کہا کہ ’’نمونے لینے کے بعد نتیجہ 24 گھنٹوں کے بعد سامنے آتا ہے جو حیرت کی بات ہے، اگر کوئی سیاح مثبت پایا جاتا ہے یا تو وہ متعدد افراد کے رابطہ میں آچکا ہوتا ہے اور اس کی تلاش کرنے پر معلوم ہوتا ہے کہ اس نے پہلگام چھوڑ دیا ہے۔‘‘
انہوں نے ریپڈ ٹیسٹنگ کا مطالبہ کرتے ہوئے کہا ’’اگر بر وقت کسی کا نمونہ مثبت آتا ہے تو اس کے ساتھ ایس او پیز پر عمل کرتے ہوئے اسے علیحدہ رکھا جا سکتا ہے اور اس سے وائرس کو مزید پھیلنے سے روکا جا سکتا ہے۔‘‘
