ضلع اننت ناگ کے وارین کھرم، بجبہاڑہ کے علاقہ میں پانی کی شدید قلت کے سبب لوگوں کو مشکلات کا سامنا کرنا پڑ رہا ہے۔
ای ٹی وی بھارت کے ساتھ بات کرتے ہوئے مقامی باشندوں نے محکمہ جل شکتی کے افسران پر پانی جیسی بنیادی ضرورت کے حوالے سے غیر سنجیدگی کا مظاہرہ کرنے کا الزام عائد کیا ہے۔
مقامی لوگوں نے بتایا کہ انہیں کئی کلومیٹر دور سے پانی لانا پڑتا ہے اور وہاں بھی انہیں ہفتے میں صرف دو دن ہی پانی فراہم ہوتا ہے۔ جس سے انکی ضروریات پوری نہیں ہو پاتیں۔
جھلسا دینے والی گرمی ہو یا جما دینے والی سردی، بارش ہو یا برفباری وارین، کھرم کے لوگوں کو ہر موسم میں پانی حاصل کرنے کے لئے مشقتوں کا سامنا کرنا پڑتا ہے۔
انہوں نے کہا کہ کئی بار اعلیٰ حکام تک شکایات پہنچانے کے باوجود انہیں پانی جیسی بنیادی ضرورت سے محروم رکھا جا رہا ہے۔
ای ٹی وی بھارت نے اس ضمن میں محکمہ جل شکتی کے اسسٹنٹ ایگزیکیٹو انجینئر سے بات کی تو انہوں نے علاقے میں جلد ہی بور ویل نصب کرنے کی یقین دہانی کی۔
